و أخيراً ... مريم وتركي ... الجزء الثالث و الأخير

مريم : اخذني معاك اشفيها خالتي ؟

تركي : لا إنتي يالله خفيتي و آنا أخاف عليج ترد لج الصخونة مرة ثانية خليج مرتاحة و آنا لما أرد أقولج السالفة
مريم : آنا الحمدلله الصخونة راحت مني و أحس روحي أحسن و بعدين من صجك تبيني أنطرك ترد تقولي ما تسمع آمنة شقالت أمك خايفة و ترجف و آنا بصراحة ما فيني صبر أنطرك ترد آنا رايحة معاك
تركي : على راحتج مدامج بتيين ما أقدر أقولج لأ . بس حبيبتي طالبج مهما تقولج أمي لا تزعلين و طوفي عشاني
مريم : من صجك أمك أمي و أهلك أهلي و آنا لا يمكن أرد عليها أو حتى أرفع صوتي عليها تطمن آنا فاهمة و مقدرة
تركي : عيل بسرعة ما نبي نتأخر

بدلوا ملابسهم شال تركي لولو سبق مريم نزل الصالة و كان يستعيل مريم

يناديها : يالله مريوم يالله يا يبه لا نتأخر عليها

تطلع مريم من دارها مستعيلة و تنزل عالدرج بسرعة من سرعتها و طول عباتها تنعثر بطرفها و تطيح من الدرج على بطنها تصرخ آآآآآآآآآآآآآآآآآآآآآآه و يغمى عليها

يركض لها تركي يخلي لولو على الأرض يرفع مريم يحاول يقعدها (منصدم يصرخ ) مريم مريم ردي علي
مريم مغمى عليها و ما ترد
يدق على الإسعاف بسرعة يوصلون يسعفونها و يركبونها الإسعاف و يركب اهوه و لولو

و بالطريج ( يحاول يقعدها ) مريم . مريم حبيبتي ردي علي ؟

يوصلون المستشفى ينزلونها و تركي يسوي ضجة في المستشفى يدور الدكتور

و ينادي الدكتور : دكتور الحقني مرتي طاحت من الدرج و فجأة اغمى عليها
الدكتور : ( يهدي تركي ) اهدى اهدى ( يفحص مريم ) و يسأل تركي : شنو اهيه حامل ؟
تركي : إي حامل
الدكتور : خلاص عيل انطر بره و آنا إن شاء الله راح أطمنك

ينطر تركي بره مثل ما قاله الدكتور
بعد الفحوصات يطلع الدكتور

يروح له تركي طاير : ها دكتور بشر ؟
الدكتور : مرتك الحمدلله بخير بس يؤسفني إني أقولك إنها افقدت الجنين الطيحة كانت قوية عليها و إن شاء الله كل شيء راح يتعوض أهم شيء الحين حالة مرتك النفسية و صحتها و الباجي إن شاء الله يتعوض
تركي : ( دموعه بعيونه ) لا حول و لا قوة إلا بالله . شلون جذي ؟ ليش ؟
الدكتور : أفا يا تركي لا تبجي إنت ريال مؤمن و قوي و مرتك أهم من الجنين . و إن شاء الله إنت و مرتك بسلامتها راح تعوضون كل شيء
تركي : الحمدلله على كل حال . انزين دكتور أقدر أشوفها الحين
الدكتور : الحين لأ احنا عطيناها مخدر و نامت عشان تهدى و تنام و إن شاء الله أول ما تقعد تقدر تشوفها
تركي : مشكور دكتور و الحمدلله على سلامتها

تبجي لولو

تركي : اشششش لولو حبيبتي سكتي مو وقته يحاول يسكتها ما تسكت يروح معاها اييب لها الحليب من السيارة و يرضع لولو

و اهوه يرضعها تآخذه الأفكار بعيد و يتذكر مريم شلون كانت ترضع لولو و تغني لها شلون كانت تلاعبها يرفع عينه للسما و يدعي ربه : يارب إنك تخليها و تحفظها لي و للولو يارب ما أتخيل حياتي بدونها

يرن تلفونه و يرد للواقع يشوف الرقم و إلا أمه

آمنة : ها وينك ؟ مو قلتلي إنك ياي بالطريج ؟ وينك تأخرت ؟
تركي : وين أمي عطيني إياها
أمه : ها تركي عسى ما شر ؟
تركي : يمه مريم . مريم يا يمه
أمه : بعد اشفيها ؟
تركي : ( يبجي . و يبدأ يقولها اللي صار بالضبط و بالتفصيل ) يوم قعدنا آنا و مريم الصبح ما لقيناج خفنا لا يكون صاير لج شيء و قالت لي مريم ليش ما تدق على آمنة تسألها ؟ دقيت على آمنة أسألها عنج قالت لي أمي طلعت منكم خايفة و ترجف عاد مريم قالت لي : خلني أروح معاك أتطمن على خالتي و أعرف اشفيها قلت لها إنتي تعبانة قالت لي : لأ لازم أتطمن عليها و كنت أستعيلها و اهيه نازلة من الدرج و من حنتي و اهيه نازلة انعثرت بعباتها و طاحت و اغمى عليها فقدت الجنين و اهيه الحين بالملاحظة منومة
و كل اللي صار لها عشانج من خوفي عليج استعيلتها و صار اللي صار
أمه : ( يقشعر جسمها ) عشاني ؟
أمه : آنا يم التلفون أي شيء يصير بلغني
تركي : يمه من صجج بعد اشبيصير أكثر من جذي أقولج مريم بالملاحظة و افقدت الجنين تقولين لي قولي عن أي شيء يصير ( يحاول يحنن قلبها ) يمه آنا تعبان و مو عارف أتصرف مريم من صوب و لولو من صوب يمه تكفين محتاج لج يمه الله يخليج لا تتخلين عني آنا بهاللحظة صج محتاج لج

موضوع مريم و اللي صار لها حرَّك في أم تركي مشاعر الأمومة و بلا شعور تذرف دموعها

أمه : خلاص خلاص يلا كانا يايين آنا و آمنة
تنادي آمنة : آمنة
آمنة : نعم يمه
أمها : بسرعة بدلي و نزلي
آمنة : عسى ما شر وين آنا وياج رايحين
أمها : بالطريج تعرفين بس بسرعة

تآخذ أمها مفتاح السيارة و بسرعة و اهمه بطريجهم للمستشفى

آمنة : يمه وين احنا رايحين ؟ شالسالفة ؟
أمها : تقولها اللي صار بالتفصيل
تحس بالندم تجاه مريم و تقول : ما كنت أتوقعها تهتم لي لهالدرجة مع كرهي لها و صخونتها و حملها حرصت على إنها تيي تتطمن علي لا و آنا وياج كنا ناوين نخرب بيتها و نقول لتركي على كل شيء ما صار و ما سوته
آمنة : يمه تعرفين تركي يبالغ و بس يدافع عنها
أمها : لأ تركي ما يدافع عنها لأنها بالمستشفى منومة و فقدت الجنين و كل هذا مني و عشاني و احنا الحين رايحين لها
يصحى ضميرها و تحس بالندم تجاه مريم و تبدي تقنع آمنة و تحسسها بالجريمة اللي سووها
أقول آمنة لي متى احنا جذي على هالحال ليش أبعد ولدي الوحيد عني بإيدي و لأسباب تافهة آنا ما أدري وين كان عقلي يوم سمعت كلامج و رضيت إنج تروحين لساحر و تسوين لها سحر تركي عمره ما رد أحد تقدم لج و لا منع أحد عنج بس احنا عسى الله يسامحنا ما فكرنا بعقلنا في لحظة ضعف سوينا جريمة و ارتكبنا محرم و لو تفكرين فيها أسباب تافهة ما كانت تحتاج منا كل هذا كنا نقدر نحل الأمور هذي بقعدتنا و نقاشنا مع بعض مو نروح من ورا ظهرهم و نسوي هالسوالف المفروض نكون واضحين من البداية و آنا أمه بدال ما أدور على سعادته و راحته كنت أفكر شلون أتعبه و أعذبه و أغصبه على نور و اهوه ما يبيها عشان الجنسية معقولة أوخره عن مرته و بنته و سعادته عشان نور تآخذ الجنسية يعني نور أهم من سعادته صج ما عندي سالفة و لا جنه ولدي وحيدي لا حول و لا قوة إلا بالله صج الشيطان وقتها كان شاطر الله يلعن الشيطان و ساعته
يمه آمنة إذا تحبيني خلينا نفتح معاها صفحة يديدة تردين رفيجتها مثل أول و آنا خالتها و اهيه جنتي و لولو حفيدتي تناديج عمتي بس تعبنا من المشاكل و الهم
آمنة : ( تتحسف على اللي سوته و يصحى ضميرها ) الله يلعن الشيطان أي شيطان احنا كنا أشطن من الشيطان نفسه احنا اللي قصينا على الشيطان
أمها : الشيطان عمره ما قص علينا احنا اللي قصينا عليه بس الحين الحمدلله اللي صحينا و الله هدانا و إن شاء الله كل شيء يتصلح
آمنة : احنا شسوينا آنا ما فكرت بعقلي كلش الغيرة منها و الحسد عموني ما فكرت و لا خطر على بالي إني راح أتزوج و يمكن الله يجازيني على اللي سويته. يمه احنا لازم نوقف مع تركي بهالموقف اهوه حيل محتاج لنا و حتى مريم محتاجة لوقفتنا يمها لازم نساعدها تتخطى هالمحنة و لازم نطلع السحر من بيته بدون لا يدرون مثل ما دخلته و هم ما يدرون
أمها : خلاص من هاللحظة راح نتغير للأحسن و إن شاء الله بس تطلع مريم من المستشفى و تصير أحسن و تتخطى هالمرحلة راح نروح كلنا العمرة نستغفر الله و نتوب له و نتمنى إنه يغفر لنا و يسامحنا على كل اللي سويناه حتى مريم و تركي إن شاء الله يسامحونا على اللي سويناه

يوصلون للمستشفى بعد حديث طويل دار بينهم في النهاية ياب نتيجة

تركض آمنة لتركي تآخذ عنه لولو و تلمه

تيي أمه تبجي و تلمه : ( تطلب منه يسامحها ) سامحني يمه آنا و آمنة أخطينا بحقك و أذيناك و كنا السبب بكل اللي صار لمريم و لك سامحنا يمه
و آنا خلاص ما راح أزوجك نور . مريم أصيلة و اللي صارلها عشاني خلاها تكبر بعيني و أحبها صج ( رب ضارة نافعة ) و مريم راح تظل طول العمر زوجتك و لولو بنتك و محد راح يفرق بينكم
تركي : ( منصدم من ردة فعل أمه ) من صجج يمه . و إلا تواسيني و إلا تتغشمرين معاي ؟
أمه : و الله من صجي لا أواسيك و لا أتغشمر معاك آنا صاجة بكل كلمة قلتها و الله يشهد علي
تركي : لا يمه لا تقولين سامحني إنتي أمي و آنا مسامحج حتى آمنة مسامحها المهم عندي إنكم حسيتوا بغلطكم و عرفتوا قيمة مريم و أهميتها عندي و الباجي كله مو مهم

و وقت نقاش تركي و أمه تقطع نقاشهم آمنة
آمنة : أقول تركي مريم عندها ملابس ؟ و لولو غيرت لها و إلا لأ ؟
تركي : لأ مريم ما عندها ملابس
و ما أعرف أغير للولو العادة مريم تغير لها الله يقومها بالسلامة
آمنة : إن شاء الله . إنزين ممكن تعطيني مفتاح بيتكم أروح أبدل للولو و أييب ملابس لمريم
تركي : إي اختي إنتي تآمرين أمر و مشكورة
آمنة : ما يآمر عليك ظالم . العفو

تروح آمنة بيت تركي و تآخذ معاها لولو توصل بيته تغير للولو و تحط ملابس لمريم تعدل البيت و تبخره و تشيل كل شيء حطته و تقطه
ترد تطلع من البيت بطريجها للمستشفى و اهيه طايرة من الفرح و ارتاحت إنها قدرت تشيل اللي حطته بدون ما يحسون

و بهالفترة

الدكتور : تركي مرتك قعدت تقدر تشوفها الحين بس حاول تخفف عنها و توقف معاها و لا تخليها تنفعل مو زين لها
يدخل تركي على مريم
منسدحة تبجي يدني يمها يمسح على راسها يحب راسها
الحمدلله على سلامتج حبيبتي
مريم : الله يسلمك . تركي دريت ؟
تركي : دريت حبيبتي دريت
مريم : ( تبجي ) كنت أتمنى يكون عندنا ولد كنت أتمنى أفرحك
تركي : ( يلمها و يهديها ) اششششش اهدي حبيبتي . ( يمسك إيدها و يحبها ) هذي إرادة الله و إنتي إن شاء الله بسلامتج تعوضينه بس إنتي الله لا يقوله لو صار فيج شيء منو بيعوضني عنج حريم الدنيا ما يعوضوني عنج و بعدين آنا ولدج تعودت تكونين لي أمي الحنونة و زوجتي و كل شيء تدلليني و تدلعيني و آنا غيور ما أخاف ايينا ولد يآخذ مكاني منج
تطالعه مريم بدموعها و تبتسم له
تركي : ها يبه شلونج الحين إن شاء الله أحسن ؟
مريم : أكيد أحسن دامك يمي و معاي
تدري حبيبي لو مو الله ثم وجودك يمي جان آنا الحين الله أعلم بحالي بس الحمدلله اللي الله عطاني ريل مثلك طيب و حنون
تركي : أدري يا عمري أدري . أقول مرايم عندي لج مفاجأة
مريم : شنو ؟
تركي : نطري و بتعرفين

تركي : يطلع بره ( ينادي امه ) يلا يمه
أمه تدخل على مريم
تحبها على راسها
أمه : ما تشوفين شر بنيتي و سلامتج ألف سلامة عليج شلونج الحين إن شاء الله أحسن
مريم ( تطالع تركي مستغربة ) يطمنها تركي و يبتسم لها
مريم : هلا هلا خالتي الشر ما ييج إن شاء الله و آنا الحمدلله بخير دامج معاي و يمي
أمه : مريم يمه سامحيني آنا وايد غلطت بحقج ما كنت أعرف قيمتج و الله يعلم إنج الحين بغلات آمنة و أكثر
مريم : خالتي لا تقولين هالحجي الأم ما تعتذر من بنتها إنتي أمي و خالتي و تمونين و إنتي ما تدرين آنا شكثر أحبكم و شكثر الحين استانست لما قلتيلي إني بغلات آمنة و أكثر

تدخل آمنة و معاها لولو و أغراض مريم
و من شدة فرح مريم ( تذرف دموع الفرح ) تقولهم : ما تدرون شكثر كنت أتمنى إنا نكون مع بعض و الحمدلله اللي جمعنا مع بعض و لو أدري إني أذا فقدت الجنين راح تييون جان من زمان طيحته بنفسي عشان تييوني
أمه : لا يا حبيبتي لا تقولين هالكلام آنا اللي غيرني موقفج تجاهي يوم قالي تركي عن اللي صار لج و ليش صار ؟ و شلون ؟ كبرتي بعيني و حبيتج
و بمناسبة لم شمل العائلة إن شاء الله بس تطلعين بالسلامة راح نروح كلنا على حسابي العمرة نعتمر مع بعض نجدد إيماننا من زمان ما اعتمرنا
تركي : يمه صج
أمه : إي صج
آمنة : يعني لولو راح تعتمر ؟
مريم : إي شعليها بتعتمر مع يدتها و عمتها بتكون أحلى سفرة بعمري كلها كونها لبيت الله من جهة و كونها معاكم من جهة ثانية
تركي : و من الحين أقول حق مريم يا عمري بعد خلاص بتعتمرين
مريم : تضحك . صج إنك تركي ما تيوز من سوالفك

تعلى أصوات الضحكات و الفرح و السعادة على عائلة تركي بعد هموم و مشاكل استمرت لمدة سنتين من زواجه

طلعت مريم من المستشفى و راحت البيت و بس تحسنت راحوا العمرة كلهم يجددون إيمانهم و خصوصاً آمنة و أمها يستغفرون ربهم بعد كل اللي سووه و اللي صار متأملين متوددين منه سبحانه يغفر لهم

بعد ما ردوا من العمرة و بعد فترة حملت مريم للمرة الثالثة بعد لولو و بعدما أجهضت الحمل الثاني كانت طول فترة الحمل يراعيها تركي و كان يمها أم تركي و اخته

و بفترة حمل مريم تقدم لآمنة عبدالله زميلها في الدوام وافقت عليه و تزوجها و سوت أحلى و أكبر عرس كان بخاطرها تسويه و بعد جم شهر زواج حملت

بالنسبة لمريم الله عوضها بصبيان توم سموهم يوسف و يعقوب

أما آمنة فالله رزقها ببنت سمتها مريم على اسم رفيجتها و مرت أخوها

و كل من مريم و تركي و آمنة و عبدالله اتفقوا يربون عيالهم على الحب و القيم و المباديء الحلوة بعيد عن الحقد و الحسد و الكراهية

و بالنسبة لأم تركي و آمنة كانت سعيدة بأحفادها و فرحانة بعلاقة تركي و آمنة مع بعض شلون ردت مثل قبل و أحسن
و عاشت عايلة تركي عيشة سعيدة

و بس خلصت القصة و ملصت و يت الديايه و عنفصت لووووول

النهاية
the end

إن شاء الله كانت القصة حلوة و عجبتكم و عورت قلبكم ههههههه و كانت نهايتها سعيدة
و إن شاء الله أكون خوش مؤلف و كاتب قصص

أبي رايكم

في القصة ؟ و فيني أقصد كتابتي ؟
توقعتوا هالنهاية ؟
أبي نقد على الإسلوب و على الحوار و على الكتابة ما أبي بس المدح

أتمنى أشوف رايكم

همسات مني لكم :)

كل حياة ما تخلى من المشاكل و الهموم و الشاطر فينا اللي يتقلب على همه و مشكلته بدون ما يدخل أي أحد و يسامح و يغفر و الله كريم
احنا مو أكرم من الله احنا لازم نسامح و نغفر أدري إن احنا ما نقدر كبشر بس نحاول ليش لأ حلو إن الواحد يرحم و يحن حتى لو كان عايش أو قاعد مع ناس ما يرحمون أو ما يحنون يحاول يصير أحسن منهم و يخليهم مثله لا يتغير و يشيل الرحمة من قلبه خله دايماً ثابت على قيمه و مبادئه و لا يتنازل عنها لو شنو
و لازم كل واحد فينا ما يحكم على أي أحد بناء على راي شخص فيه خلك إنت اللي تحكم على الشخص بناء على معاملته لك مو تحكم عليه بناء على معاملته لغيرك و لازم الواحد فينا يتأكد من أي شيء قبل لا يحكم الظلم صعب على النفس و يقهر خلوكم دايماً مظلومين أحسن من ما تكونون ظالمين ترى الظلم ظلمات يوم القيامة و اتقوا دعوة المظلوم خلوكم دايماً مقهورين أحسن من إنكم تقهرون صدقوني جذي أحسن و أسهل على النفس من العكس

هذي نصيحة من البلوقر الكويت حبي لجميع البلوقرز و غيرهم

حرصت في تأليفي للقصة إنها تكون كلها مواعظ و حكم و عبر حتى تستفيدون أكثر من إنكم تستمتعون و هم حرصت على إني أكون بمنتهى الدقة في التفاصيل عشان تعيشون الأحداث و الواقع و تحسون اشكثر حياتهم مثالية و كلها فرح و سعادة قبل لا يدخلون أمه و اخته حياتهم
طبعاً في أمهات سنعيين مع جناينهم و أحسن منهم ماكو مثل الأم مع بنتها و يمكن أكثر و في خوات صايريين مثل صديقات لمرت أخوهم مو صعبة و لا مستحيلة
الحالة اللي كتبت عنها موجودة بس ينعدون على الأصابع و مثل مافي اللي فيهم خير في اللي فيهم الشر
لا تستغربون مثالية مريم و طبيعة تركي الأمثلة على مريم و تركي وايدة و شيء عادي إن الزوج يحب زوجته و إن الزوجة تحب زوجها دايماً يتساعدون و يديرون بالهم على بعض سالفة الحب و الإنسجام يبيلها وقت و لازم من أول يوم كل واحد يعلم الثاني طبعه و شنو يحب و شنو ما يحب و بجذي الإتفاق و الإنسجام بيكون حيل سهل و كل شيء بيكون سهل مع الوقت و التعود ما راح يكون أي شيء صعب و حلو الواحد يصبر على الثاني و يطوف و الزعل الزايد و بدون سبب ماله داعي بيخلق فجوة و فراغ كبير بين الزوجين يمكن آنا صغير و ما عندي الخبرة الكافية و لا أعرف بهالسوالف بس الحياة علمتني و الحياة تعلم و الشاطر اللي يستفيد من تجاربه و تجارب الآخرين

همسة

لا تفكر بكل حياتك إنك تدعي على أحد مهما ظلمك
و إذا كنت حيل متضايق من أحد و مظلوم و تبي تدعي عليه ادعى عليه بهالدعاء

اللهم ارحمه بقدر ما عذبني
و أفرحه بقدر ما أتعسني
و أضحكه بقدر ما أحزنني
و آمنه بقدر ما أرعبني
و أعطه بقدر ما حرمني
و أوصله بقدر ما قطعني
و افتح أبواب الرزق بوجهه مقدار ما أغلق أبواب الحياة في وجهي

سلامي لكم :)

مسَّبه ؟

هالفترة حايشتني حالة غريبة بعيد عنكم

أحس روحي مسَّبه و كلمة شارد الذهن وايد تنقالي بين أهلنا و ربعي الكل يقولي : اللي مآخذ عقلك يتهنى به

أقولهم و الله محد مآخذ عقلي بس ما أدري اشفيهم مو مصدقيني ؟

آنا العادة ما عندي هالسوالف لا عقل و لا قلب ولا بال طاير بس من دخلنا شهر 8 و آنا متعومس و فيني تسِّبه مو طبيعي ما أدري ليش؟ أقصد إني من قبل ما كنت أعاني من هالشغلة بس هالفترة شرودي و سوالفي زايدة اللي يشوفني يقول حاب مع إن ماكو شيء من هذا

أسولف مع واحد من ربعي عن حالتي يقولي كله من الغزو ما تشوف هالحالة يتلك من شهر 8 آنا اهني فصلت و مت من الضحك عليه بصراحة حده ضحكني شكو حالتي بالغزو ؟ و بعدين الغزو ووووووي من متى و آنا توني الحين هالشهر يتني هالحالة
بصراحة الولد حده فاصل و مينون و إلا الغزو شكو ؟

عشان أفهمكم أكثر راح أعطيكم جم مثال

مثلاً

واحد

مرة من المرات كنت متواعد مع ربعي على طلعة اتفقنا على المكان و الساعة قبلها بيوم و كل شيء كان ماشي مضبوط و على حسب الأصول
وقت الطلعة و الساعة اللي تواعدنا عليها لبست و تكشخت و تعطرت و ركبت سيارتي رايحلهم طبعاً و بطريجي لهم قعدت أفكر بالسيارة و اشغلت بالي شغلات وايد فجأة أسأل روحي آنا ليش طالع أرجع فوق تحت وأروح الجمعية أييب لي ككاو و بيبسي و أترس السيارة بانزين و أرد البيت و أنسى ربعي و إني مواعدهم
و طبعاً لما أرد البيت و أبدل و أقعد على النت و اللابتوب أصمم يدق علي واحد من الربع ها وينك ؟ آنا اهني أكتشف إني مواعدهم و إني كنت طالع بروحلهم و نسيت عشان جذي غيرت طريجي للجمعية و محطة البنزين و بعدها رديت البيت و أقعد أضحك على روحي
هذا واحد

اثنين

مرة من المرات كنت قاعد مع أمي نسولف و نشرب قهوة و نطالع التلفزيون أبوي دق على أمي بالإنتركم و قالها شبيلي فحمة عشان تبخريني بروح عندي عرس واحد من الربع أمي قامت تشب لأبوي فحمة و ينزل أبوي بيتبخر تتذكر أمي إن العود و البخور فوق بدارها تقولي حبيبي روح ركض ييب العود و البخور لأبوك لا يتأخر أركض أييبله أصعد فوق أنسى ليش صاعد فوق أحاجي روحي آنا ليش صاعد فوق إي تذكرت و أييب لأبوي بوكه و ساعته و طبعاً أمي مو مطرشتني حق الساعة و البوك اهيه مطرشتني أييب العود و البخور أنزل طاير يبه هاك الساعة و البوك أبوي : إي زين عاد نسيتهم فوق
أمي : وين العود و البخور ؟
آنا : وي نسيت . أطير مرة ثانية ركض فوق بس هالمرة ذاكر و مو ناسي أييب العود و البخور و يتبخر أبوي و يتعطر و يطلع
هذي اثنين

ثلاثة

عالساعة 5 الصبح أقعد أشوف بلوقي و قروبي و إيميلي و هالسوالف قبل لا أروح الدوام أقعد في يوم من الأيام أحس روحي مصدع و تعبان أشتهي قهوة أروح أسويلي قهوة و أنساها على النار نص الماي يطش عالشولة و النص الثاني يتبخر و آنا ناسي القهوة و ما أدري وين الله حاطني تيي إختي مع القهوة ياحظي عليك وين عقلك ؟ قهوتك نشفت و تبخر مايها سويت لك قهوة يديدة
آنا : حبيبتي إختي مشكورة
هذي ثلاثة

أربعة

قاعد أتعشى مع أمي و اختي يحطون العشا و ينسون البيبسي
أمي تسأل اختي وين البيبسي ؟
إختي : وي نسيت
آنا أقول لإختي : قعدي ارتاحي آنا أييب لكم البيبسي
أروح عشان أييب البيبسي من الثلاجة أطلعه أحطه عالطاولة و أشوف أغراض بالثلاجة حوسة مو مرتبة أندمج و أرتب الثلاجة و انسى أمي و اختي و البيبسي
أمي : يا الكويت حبي وين البيبسي ؟
آنا : وووووووي
أوديلهم البيبسي و أقعد أضحك على روحي
هذي أربعة

خمسة

أيي مستعيل من الدوام ناسي موبايلي أصعد فوق بروح أييبه من داري أشوف إختي بالصالة قاعد تطالع فيلم تقولي اقعد معاي طالع أقعد أطالع و أنسى سالفة الموبايل و الدوام
هذي خمسة

تبون بعد و إلا كافي ؟ ترى عندي منهم وايد لووووووووووول
سوالفي هذي تذكرني بعبدالرحمن العقل بمسرحية لولاكي لما يقول للأخصائي الإجتماعي كله أنسى كله أنسى ههههههههه صج لقالوا شر البلية ما يضحك

دايماً يسألوني ليش مسَّبه و كل ما أشوف أحد يسألني نفس الأسئلة

ليش مسبه عسى ما شر ؟ في شيء شاغل بالك ؟ تفكر بأحد ؟ مشتاق لأحد ؟ تحب أحد ؟

آنا : ما أدري يمكن ؟

آنا حالياً أحس روحي مبعثر أفكاري مبعثرة آنا بكبري مبعثر و مو عارف ألملم روحي أحس روحي مثل انسان مشرد ما عنده وطن ينتمي له يدور له على وطن ينتمي له
أحس روحي بدون أهل مع إن الكل معاي و يمي و حولي ما أدري ليش أحس روحي وحيد مثل أغصان الخريف

ودي أحط لكم قصة مريم و تركي الجزء الثالث و الأخير أدري الكل ينطر بس آنا ماني قادر أكتب أو أعبر ما عندي أي كلمة أكتبها ما أدري وين راح اسلوبي ؟ أحس كل شيء ضايع مني كلامي أفكاري عقلي ؟

تهقون آنا شفيني بالضبط شاللي طلع معاكم ؟ <<< عادي تصيرون دكاترة نفسيين و تقيمون حالتي لووووول

حاشتكم حالة التسِّبه ؟

صارلكم موقف مثلي ؟ يعني مثل جذي

حسيتو مرة إن بالكم و قلبكم و عقلكم طايرين و مو معاكم ؟

حسيتو مرة إنكم مو عارفين اشفيكم أو اشمنه تشكون ؟

دعواتكم

إن شاء الله ما أكون طولت عليكم

سلامي لكم :)

مريم و تركي في الجزء الثاني قبل الأخير

نكمل قصة مريم و تركي في الجزء الثاني قبل الأخير

راحت مريم غرفتها بعد ما نومت لولو تسبحت فتحت كبتها قعدت تدور أي نفنوف سهرة يحبه تركي تفكر أي أكثر نفنوف راح يشده و خذتها الأفكار و سرحت وتذكرت يوم كانت بتروح عرس بنت خالتها ودار هالحور بينها وبين تركي
أقول تركي بروح عرس بنت خالتي أي نفنوف حلو
تركي : كلهم حلوين يبه إنتي أي شيء تلبسينه حلو عليج حتى لو لبستي خيشة هم حلوة عليج
مريم : عن التنكت شنو خيشة وين قاعدين ؟ يلا قولي أي نفنوف أحلى ؟ إنت شنو تحب ؟
تركي : شوفي الوردي وايد حلو عليج و إلا تدرين الأسود ملك الألوان حلو و حطي عليه عقد اللولو واو بتصيرين و لا نجمات هوليود
مريم : صج ؟ . زين قولي شسوي بشعري ؟
تركي : على راحتج سوي فيه اللي تبين بس ها خليه مفلول حلو شعرج طويل حرام ترفعينه و تخشين طوله بس ها لا تكشخين وايد لا يخطبونج ترى أغار عليج
ترد مريم للواقع و تضحك
مريم : إي الأسود و عقد اللولو و أفل شعري
لبست الأسود و عقد اللولو فلت شعرها تمكيجت و تعطرت بعطر على الرغم من هدوئه انتشر بالصالة وملا الجو مع أنغام الموسيقى الكلاسيكيه اللي جهزتها حق الليله شبت الشموع حطت الورد على الطاولة زهبت الطاولة للعشا و قعدت تنطر بالصالة

وصل تركي البيت فتح الباب

تركي : السلام
مريم : و عليكم السلام
happy birthday to u
happy birthday to turki
تركي : اشفيج حبيبتي ينيتي ما كبرتي على هالسوالف و بعدين شنو هذا شصاير ؟ شمسوية بروحج ؟ فجي الليتات و طفي الشموع و روحي غيري اللي لابسته و شيلي هالخرابيط اللي على ويهج
مريم : آنا ينيت . ما كبرت ؟ تركي شفيك ؟ عسى ما شر ؟ طفيت الفرحة بقلبي
و آنا قلت بسويلك عيد ميلاد و أفاجئك أبي أفرحك و إنت تقولي ينيتي و ما كبرتي و روحي بدلي و شيلي كل شيء شهالحجي حرام عليك
مريم تطالعه بنظرة منكسرة . تكتم الحرة بقلبها و الدموع بعيونها
تركي : ( ما يتحمل نظرتها يحاول يرضيها ) . آنا آسف حبيبتي و الله آسف مو مني عفية لا تعورين قلبي و الله مو ناقص و الله تعبان
تحاول تظهر له إنها مو مهتمة تقنع روحها إنه عادي معصب . تآخذ نفس عميق تحاول إنها ما تعصب و تحنن قلبه و تلينه عليها
مريم : ( تدني يمه ) . اشفيك حبيبي قولي ؟ شاللي متعبك ؟ منو متعبك ؟ منو مضايقك ؟
تركي : و لا شيء بس طلعت من الدوام مصدع و مريت أمي صدعت أكثر
مريم : أييب لك أدول . بروفين تبي شاي . قهوة عشان يروح عنك الصداع
تركي : أف زهقتيني من دخلت و إنتي شغالة تحقيق و أسئلة خليني على راحتي
مريم :( بنبرة حزينة ) شسوي خايفة عليك و أحاتيك مو مني
تركي : إي مو ما أدري قالولج ياهل تخافين علي و تحاتيني يبه إذا بتحاتين و تخافين على أحد عندج لولو خافي عليها على راحتج إهيه الياهل مو آنا شكلج ما قمتي تركزين
مريم تحاول ما تبجي و تظهر له دموعها بس ما تقدر تتحمل كلامه تحتر و تذرف دموعها
مريم : ( بدموعها ) ما تلاحظ إني ما قلت لك شيء و إنك من ييت عفست الدنيا علي و لو أدري إن عيد الميلاد بيعفسك جذي ما سويته من الأصل آنا أفكر شلون أسعدك و إنت تفكر شلون تضيق خلقي حرام عليك حس فيني من الصبح رايحة و رادة و لولو يننتني يبيلها مجابل و قاعدة أحاول عشانك أبي أوريك إنك غالي و إني مو ناسية عيد ميلادك و إنت ولا همك و بدال ما أشوف الفرحة و الضحكة على ويهك تييني مكشر و حمقان و ماد البوز شبرين شدعوة ليش كل هذا ؟

تركي يقعد على الكنبة يقعدها بحضنه يمسح دموعها و يحب عيونها

تركي : يا عمري قلتلج آسف و قلتلج عذريني آنا تعبان و متضايق الحين و حاولي تفهميني بس إنتي ماكو مقفلة . عمري إنتي حبيبتي خليه يوم ثاني و أوعدج إني إن شاء الله راح أعوض لج هاليوم
مريم : آنا ماراح أعذرك و ما راح أرضى بأقل من إنك تحتفل معاي بعيدك حتى لو كنت متضايق و غير جذي و الله عمري ما راح أرضى . و بعدين شنو يوم ثاني أقولك اليوم عيد ميلادك تقولي يوم ثاني ؟ لا إنت كلش مو طبيعي
و بعدين التعب و الضيق مو حجة و حتى لولو نومتها عشان ما تحن و تبجي و تخرب علينا لا تتحجج بالتعب يلا بدل و تعال انطرك
تركي : خلاص حبيبتي مثل ما تبين بس خليني أبدل و أييج
يدخل غرفة النوم يتأمل لولو و اهيه نايمة و يحاجي نفسه : يا ليتني مثلج ما أدري لا عن الدنيا و لا عن غيرها ياليتني ما أعرف الهم و لا أدل طريجه و أقدر أونس مريم على الأقل هاللحظة بس ما أقدر . مسكينة مريوم تحاول قد ما تقدر تسعدني و آنا طفيت الفرحة بقلبها ياربي شاللي سويته كله من أمي و آمنة الله يسامحهم عفسوني و عفسوا مزاجي

يدخل الحمام يغتسل يطلع و يفتح الكبت يآخذ ملابسه و يبدل
يحاجي روحه : آنا ليش عصبت عليها آنا متضايق و تعبان من نقاشي مع أمي . اهيه شكو أعصب عليها
آنا مو زعلان عليها كثر ما آنا زعلان عشانها و خايف على مشاعرها شكلي حست الدنيا
مريم : تركي يلا ما صارت

تركي يلا يلا كاني ياي قاعد أتعطر لج

دخل تركي الصالة يحاول يكون طبيعي جدامها و يمسك أعصابه

مريم : ( تقوم له ) الله شهالعطر الحلو . ( تمسك إيده ) تكفه عاد يلا عشاني اضحك يلا مالي خاطر عندك . اشدعوة مستكثر علي ضحكة
تركي : يضحك نص ضحكة
مريم : شهالابتسامة الصفرة ؟ أبي ضحكة و ابتسامة عريضة تقدر تقول ترضي غروري ما أبي نص ضحكة ؟
تركي : ههههههه خلاص جذي زين ارتحتي ؟
مريم : اشفيك ينيت آنا مو ياهل عشان تقص علي آنا أبي ضحكة من قلبك مو ههههههه
تركي : شلون يعني ما راح نخلص اليوم بتظلين طول اليوم تحنين على ضحكة أف و بعدين ؟
مريم : صح شكلي مصختها آنا شفتك متضايق و كل اللي أبيه ترد تضحك و تستانس مثل الصبح و أحسن و مثل ما تعودت عليك و سويت لك عيد ميلاد حسبتك راح تستانس و لو كنت أدري إنه بضييق خلقك و إن عيد الميلاد لليهال ما سويته أصلاً
تركي : يبه حقج علي بس آنا متضايق مو مني و منو قالج إني مو مستانس آنا وايد مستانس بس قلتلج آنا متضايق شوية و ما أدري شلون رديت عليج هالرد و الله من الضيق و الهم . تركي ( طالعها بنظرة كلها لين و رقة يسترجي فيها إنه تفهمه و ترضى عليه ) مريوم حياتي لميني أحس روحي مشتت و مبعثر و مو قادر ألملم روحي
مريم : ( تلمه حيل تمسح على راسه و تلعب بشعره ) . تدري ساعات أحسك مثل الياهل تتهاوش عشان أحن عليك و ألمك معظم وقتك مبعثر و تحتاج مني ألملمك
تركي حبيبي عادي انسى و لا تهتم طوف
مو يا عمري لو إنت بس تقولي شاللي مضايقك و يايبلك الهم شوف يمكن أقدر أساعدك ؟
تركي : صدقيني متضايق و أحس روحي مشتت و مبعثر و ماني عارف ألملم نفسي صدقيني
و إنتي ما تقدرين تساعديني و لا راح تقدرين كل اللي محتاجه منج تكونين يمي و معاي و تتحمليني هالفترة

يلا خلينا نحتفل و نستانس

تقعد لولو على صوت نقاشهم و تبجي تروح مريم تييبها تلاعبها لولو يا لولو
لولو تبجي وا وا وا وا وا
مريم تنادي تركي : حبيبي امسكها خلني أسوي لها الحليب شكلها يوعانة
تركي : خليج عندها آنا أسوي لها الحليب

يودي الحليب لمريم
يوقف تركي عند باب الغرفة يتأمل شعر مريم المفلول و خصلاتها الناعمة و لمتها للولو بحضنها و شلون تلاعب لولو بألعابها يتذكر قبل لا تحمل مريم بلولو شلون كانوا يزهبون لها غرفتها و يشترون لها الألعاب اللي الحين غرفتها متروسة منهم يحمدالله على الزوجة الحنونة و الذرية الصالحة ويتحسر شلون أمه واخته ما يحبونها وشلون يبونه يضيع هالراحة و النعمة و يخرب حياته يتنهد بحسره و يروح يعطيها الحليب ترضع لولو

يقعد تركي يم مريم يراقب لولو و اهيه ترضع الحليب يقول لمريم : صج سبحانه اللي علمها شدراها إن الحليب ترضعه شوفي شلون هدت و سكتت يوم يبت لها الحليب
لولو تتخدر من الحليب و بتنام تغمض عيونها و ترد تفتحها تعمضها و ترد تفتحها
تقولها مريم : يلا نامي لولو حبيبتي نامي لولي يا لولوااا لولو نامت حبيبتي نامت
تركي : ( يتنهد ) آآآآآآآآآه يا ليتني لولو
مريم : اششششش تركي لا تطلع صوت خلني أحطها بفراشها
تحطها يطفي تركي الليتات و يطلعون

يطلعون الصالة و تحط مريم لتركي العشا يقعد تركي و مريم على رآس الطاولة
ما في أي صوت غير صوت الموسيقى و الشوك و السجاجين
تحاول مريم تفتح موضوع
أقول تركي : شلون أمك و آمنة
تركي : بخير زينين ما عليهم
مريم : دوم إن شاء الله يكونون بخير
تركي : الله الله شهالعشا الحلو يعطيج العافية حبيبتي على هالعشا الحلو و الطباخ السنع
مريم : يعافيك أهم شي العشا عجبك و عليك بالعافية
يخلصون العشا و تشيل مريم الصحون و العفسة اللي عالطاولة

تييب الكيكة و تسحبه من إيده يلا تركي يلا تعال طف الشموع
تركي هوووووووف
مريم : بعد هذي وحدة ما طفت
تركي : يلا مرايم طفيها معاي
كلهم مع بعض هوووووووووف
تصفق مريم لتركي و تقوله : كل عام و إنت بخير كل عام و إنت حبيبي و عسى الله لا يفرقنا و عسى الله يحقق لك كل أمانيك
تركي : آمين يا قلبي

تروح مريم بتحط له أغنية
تركي : لا لا لا مابي اغنية أبيج إنتي تغنيلي الأغنية اللي بتحطينها لي الحين
مريم : يا غالي و الطلب رخيص بس أغنيلك ؟ ما طلبت شيء
مريم تطالع تركي بدلع و تغني له : غنوا لحبيبي و قدموا له التهاني فيه عيد ميلاده يا عساها مية عام
افرح حبيبي و اطلب أغلى الأماني الليله يا عمري تناديك الأحلام
و دعت عام و قابلك عام ثاني تعال نقضي العمر في حب و هيام
انسى الهموم اليوم و اضحك عشاني و الله ابتسامة منك تسعدني أعوام
تركي يلا اضحك ما تسمع اشقتلك انسى الهموم اليوم و اضحك عشاني و الله ابتسامة منك تسعدني أعوام
تركي : ( يضحك من قلبه . يصفق لها ) : الله الله يدني يمها و يلمها صكيتي على عبدالمجيد عبدالله يطلع جدامج و لا شيء
مريم : تضحك . من صجك و إلا تجاملني
تركي : لا عمري ما أجاملج من صجي

مريم : يلا يلا قص الكيكة شفيك تطالعني يلا
تركي : ( يحوس الدنيا و الكيكة . يطلب مساعدتها ) . مريومة أبوي إنتي ساعديني ما أعرف خربتها و حدي عفست الدنيا
مريم : تضحك . ما علي منك خربها على راحتك هذي كيكتك اللي بتسويه فيها سوه قصها بأي شكل كيفك بس المهم تقصها
تركي : ( متوهق بالكيكة ) يلا يلا ييبي صحنج بسرعة لا تطيح الكيكة خليني أحطلج بيحطها طاحت على الأرض
مريم : تضحك . تركي اشفيك حدك دايخ يبه الصحن بإيدي مو على الأرض
تييب مريم الشوكة تقطع طرف الكيكة . هاك تركي يلا يلا طيارة طيارة ( يضحك تركي ) همممم . اشفيج عسى ما شر ترى آنا تركي مو لولو
مريم : شسويلك أبيك تضحك و الحمدلله اللي شفت ضحكتك اليوم و ضحكت عن خاطري

أقول حبيبي ودي بهالمناسبة أقولك إني حيل أحبك و أموت عليك و إنت كل شيء بدنيتي و الله لا يفرقنا عن بعض يارب و يجمعنا دايم على الحب و الخير و إن شاء الله أظل طول عمري حبيبتك و زوجتك و الله يقدرني أسعدك و أريحك و أرضيك

يلا الحين غمض عينك
يغمض عينه تروح تييب له الهدايا
مريم : يلا الحين افتح عيونك ؟
تركي يفتح عيونه
مريم : هذي هديتي لك العطر اللي تحبه و ساعة أغلى ساعة لأغلى و أروع زوج و حبيب
تركي : الله شهالشغلات الحلوة و الله إني غالي عندج و موشوية
و الله ما أدري شقولج مشكورة بعد عمري ما قصرتي
أدري اليوم كنت مو على بعضي و أدري إني مقصر معاج بس لأنج سنعة و عاجلة و فاهمة طوفتيها و ما قصرتي
و الله إنتي و لولو عندي بالدنيا كلها و آنا حيل أحبج بس عذريني هالفترة و طولي علي بالج
مريم : ( تتنهد و بصوت حزين و هادي ) آآآآآآآه لو تدري عن غلاتك و معزتك عندي
و بعدين لا تقولي و لا أقولك اللي صار عادي كل واحد فينا معرض للضغوط الوضع عادي و طبيعي و المفروض الواحد فينا يطوف و يتحمل الثاني و لو آنا ما تحملتك و إنت ما تحملتني منو بيتحملنا دامنا ما تحملنا بعض ؟ عدل كلامي
وآنا ما ألومك عاذرتك صدقني
يلا حبيبتي تيين ننام
مريم : لا خلنا نقعد شوية يبتلك فيلم ودي نسهر عليه و إلا خلنا نسولف تو الناس باجر عطلة
تركي : أدري حبيبتي باجر عطلة و تو الناس من عمرج بس آنا الصبح عندي شغل
مريم : خلاص على راحتك مثل ما تبي . يلا ننام

ثاني يوم

يقعد تركي مزعوج على صوت تلفون أمه و حنتها خلى مريم و لولو نايمين يجر خطواته و يآخذ ملابسه يتسحب و يبدل ملابسه بالصالة و بسرعة يطير عند أمه

وصل بيت أمه

تركي : السلام عليكم شلونج يمه إن شاء الله بخير
أمه : و عليكم السلام هلا و الله بولدي حبيبي صج ما عندك سالفة تسألني شلوني و إنت يمي أكيد بخير و أحسن حال
ها تركي متريق و إلا أقول لآمنة تسويلك ريوق
تركي : لا يمه مو مشتهي . داقة علي مبجر عسى ما شر ؟
أمه : أبي أعرف اشصار على موضوعنا ؟
تركي : ( يطالعها بنظرة يحاول يلين قلبها عليه و يتمنى منها إنها تفهمه و بكل هدوء و بدون أي انفعال ) يرد عليها : يمه حبيبتي . إنتي و عمة أبوي و بنتها على عيني و راسي أتمنى تفهميني إني ما أبيها و إني مرتاح مع مريم و إذا عمة أبوي تبي كويتي آنا راح أدور لها أحسن واحد تتزوجه أحسن مني ألف مرة
أمه : شوف لا تروح و ترد على نفس السالفة و إنت عارف ردي و كلمتي
و بعدين آنا شقلت لك أمس ؟ إذا ما تبي تتزوجها لا تمرني و لا إنت ولدي و لا أعرفك يتروالي أمس خلصنا من أحبها و تحبني لا تعيد هالسوالف وايد ترى زهقتني اللي يشوف يقول قيس و ليلى كلها مريوم طايح حظها ما عندها سالفة
تركي :( يدافع عنها ) اهيه عندي أحسن من ليلى و غيرها و لي صرت آنا قيس خل تصير ليلى و لا تغلطين عليها اهيه ما غلطت عليج
أمه : احلف إنها ما غلطت علي ؟ بعد مو ناقص إلا مريموه تغلط علي عشان أقص لسانها . إنت الحين خلصني شالحل معاك ؟
تركي : ( يرد رد يحيرهم يقصد فيه تطول السالفة لأنه بنظره استحالة يلقون له أي سبب يكرهه فيها و بجذي ما راح يطلقها و راح يفتك من سالفة نور ) .شوفي يمه ماكو حل بس . إذا تبيني أتزوج نور على مريم كرهيني فيها دوريلي أي سبب أو عيب يكرهني فيها و يخليني أطلقها و أتزوج نور و ذيج الساعة مو راح أتزوج عليها راح أطلقها

تيي اخته آمنة و طبعاً كعادتها قاطة أذونها عالباب

آمنة : قوة تركي شلونك ( بدت العيارة ) تركي عندنا أهااااا أكيد وافق على زواجه من نور ( تسوي روحها مو سامعة )؟
تركي : ( ما له خلقها ) هلا هلا . آمنة آنا قلت لأمي إذا تبوني أطلقها دورولي سبب يخليني أطلقها أو على الأقل يكرهني فيها
آمنة : ( تغمز لأمها ) بس . يا غالي و الطلب رخيص آنا من زمان أدري عنها إنها مو خوش وحدة و ما فيها خير
تركي : أثبتيلي مابي كلام مابي أظلمها أبي دليل
آمنة : أكيد بثبتلك و كلش و لا الظلم مو زين علي أظلمها حرام . بس انطر علي شوي محتاجة وقت
تركي : الوقت كله لج يبه اخذي عمري كله و أتحداج

و أثناء نقاشهم بسالفة مريم و نور دق تلفونه يشوف الرقم
تركي : زين هذي مريوم ( يرفع السماعة ) ألو هلا بالغالية صباح الخير
مريم : صباح النور عمري . وينك عسى ما شر مو من عوايدك تطلع بدون ما أقعدك أو أشوفك ؟ إنت بخير ما فيك شيء
تركي : إي بخير ما فيني شيء
أمه : عشتو بعد تعرف تحاتي
تركي : ( يمسك السماعة و يسدها ) يمه خليني أعرف أكلمها . إي حبيبتي شفتي ملابسي و الحوسة بالصالة و عبالج فيني شيء لا يبه ما فيني شيء بس قعدت على تلفون أمي و قلت مابي أقعدج و أزعجج و تخترب نومتج
مريم : طمنتني
تركي : شوفي حبيتي الحين الساعة 11 و نص تزهبي بمرج نتغدى يعني على الوحدة و عازمج بوديج السينما على فيلم كوميدي يمدحونه و إذا تقدرين ودي لولو لأمج تمسكها بس على ما نرد
مريم : صج . يلا دقايق أزهب لولو و وديها لأمي
تركي : يلا يبه مع السلامة
مريم : مع السلامة

تطير مريم تقعد لولو و تسبحها تزهب جنطة لولو تحط لها الحليب و الحفاظات و الألعاب

تدق مريم على أمها : ألو السلام عليكم شلونج يمه
أمها : هلا حبيبتي و عليكم السلام و الله بخير و الحمدلله
مريم : يمه اليوم قاعدة و إلا طالعة . فاضية و إلا مشغولة
أمها : لا قاعدة و فاضية ليش ؟
مريم : زين آنا أقولج . يمه تركي عازمني على الغدا و بيوديني السينما و بييب لولو عندج إذا ما فيها كلافة عليج
أمها : من صجج بتييبين لي حفيدتي لا كلافة و لا شيء و آنا أصلاً من زمان ما شفتها يلا آنا قاعدة أنطرها

تدق سيارتها سلف و تروح لأمها طايرة توصلها لولو و توصيها عليها و ترد البيت تتزهب للطلعة

مريم ( تحاجي روحها ) : مدام لولو مو معاي أبي أكشخ أبي أرد أيام الملجة جني توني متزوجة و ما عندي عيال ودي أستانس بهالطلعة دام لولو عند أمي
دخلت الحمام على راحتها تتسبح

و بهالوقت
تركي : يلا يمه آنا الحين أستأذن بعد سمعتيني بغديها بره و مابي أتأخر عليها . تآمرين على شيء
أمه : ما أدري منو بتغدي البرنسيسة كلها مريموه لأ مابي شيء سلامتك
تركي: ( لاحول و لاقوة إلا بالله ) . حب راسها يلا عيل يمه مع السلامة

طلع تركي و دار بين آمنة و أمها هالحوار
آمنة : ( تسأل أمها ) يمه ليش مريم مرتاحة و آنا لأ ؟ ليش اهيه متزوجة و آنا لأ ؟ ليش اهيه من عمري و رفيجتي و عندها بنت و آنا لأ ؟ ليش تركي يحب مريم و لولو و يدللهم أكثر مني و آنا لأ ؟
آنا اللي زوجتها أخوي و اهيه أول ما تزوجته شافت روحها علي و نستني صار عندها ريل و بنت و بيت و آنا لأ حتى تركي نساني و لا جنة آنا اللي زوجته إياها . بس هين مثل ما زوجتها منه راح أطلقها منه و أموتها قهر
أمها : ما عليج حبيبتي اهيه مو مطولة عنده و غلاتج عندي ما تمر هالسنة إلا و اهوه مطلقها و قولي أمي ما قالت
( أمها تقولها ليش تكره مريم ) من بداية زواجه من مريم و قبل لا أشوفها كنت رافضتها من كثر ما يسولف عنها كرهتها بس يوم حن ما حبيت أكسر خاطره خطبتها له و زوجته منها و آنا مو راضية بس ولدي الوحيد و مابي أخسره و يوم حملت و يابت له بنت كرهتها زيادة كافي إنها ما يابت له الولد اللي يشيل اسمه يابت لي بنت شبي في البنت ؟ ليش احنا ناقصين بنات
المشكلة إنج سمعتي إنه يبي شيء يكرهه فيها و جنه يدري و متأكد إن احنا ما عندنا شيء يكرهه فيها أو سالفة تخليه يطلقها
آمنة : ما عليج يمه و لا تحترين و لا شيء خلي هالموضوع كله علي و آنا راح أتصرف
أمها : و شاللي بتسوينه ؟
آمنة : بعدين أقولج بس خلي السالفة تضبط معاي و يصير خير

وصل تركي البيت. و دخل غرفة النوم شاف مريم محتارة تدور بكبتها اشتلبس
يمشي شوي شوي يوقف وراها و يحط إيده على عيونها
تركي : ( يداعبها ) منو آنا ؟
مريم : اممممم ما أدري يمكن لولو
تركي : يضحك . ها اشعندج تحوسين ؟
مريم : ما أدري شلبس محتارة ؟ قولي شنو حلو علي ؟
تركي : ماني قايلج لعانة
مريم : يلا عاد ( ترفع روحها توقف على أطراف أصابعها تحبه ) . و الحين راح تقولي ؟
تركي : إي جذي راح أقولج . لبسي البدلة الوردية وايد حلوة
على ما تبدلين بروح أتسبح بصراحة برة موت حر لاهوب و آنا من الصبح طالع و ميت من الحر
مريم : اخذ راحتك
يخليها تبدل و يروح الحمام تخلص و تنطره بالصالة تطالع التلفزيون

يبدل و يخلص يدخل عليها بالصالة
مريم : الله الله شهالأناقة يا عيني عليك أخاف ينضلونك
تركي : عيل آنا شقول عنج ؟ يلا يبه مشينا
يآخذ مفاتيحه يصك الباب يقفله و يطلعون

ركبوا السيارة و بالطريج
تركي : الله شهالعطر حده ينعش تدرين قلبتي مزاجي كله عدلتيه هذا العطر السنع
مريم : ما أدري شقولك ما أقدر على كلامك لسانك ما ينقط إلا عسل
تركي : حبيبتي طالع عليج إنتي أستاذتي بالكلام الحلو و اللي عندي نقطة ببحر من اللي عندج
مريم : تضحك . مو قلت لك ما أقدر عليك انتبه على الطريج أحسن من كلامي و كلامك

و وصلوا المطعم
المطعم كان هادي و راقي

مريم : الله شهالمطعم الحلو هذا المطعم حلو عيل شلون أكلهم ؟
تركي : أي مكان تبينا نقعد ؟

مريم : امممممم و الله ما أدري . إي شوف هالمكان حلو و هالطاولة تطل عالشارع
تركي يسحب الكرسي يقعدها و يقعد
مريم : أقول تركي مو جنه المطعم وايد هادي و ما فيه أحد ؟
تركي : وجودج معاي مالي علي المطعم و الدنيا و بعدين أحسن فاضي عشان محد يطالعج غيري
مريم : حبيبي و الله
تركي : جرسون ييبلنا ماي و عطني المنيو
يتشاورن شنو يطلبون غدا يطلبون و ينطرون الطلب يوصل

و بهالوقت على ما يوصل الطلب قام تركي يذكر مريم بأيام الملجة
تركي : أقول مريوم تذكرين لما كنا نطلع مع بعض و عسى ما حطيت إيدي على إيدج قلتيلي وخر عني ما تمد إيدك علي إلا بعد العرس
مريم : تضحك . بعد كنت خايفة تقص علي و ما تسويلي عرس مثل بنات هالأيام يتفقون مع الريال على كل شيء و بس يطلع معاها يقص عليها و يروح عليها كل شيء و تظل البنت لا عرس و لاشيء

يوصل الطلب و يسكتون يتبادلون النظرات و الإبتسامات . يحط الجرسون الغدا يبدون غداهم و يكملون سوالفهم

تركي : إي و الله صاجة بس آنا ما أسويها آنا خوش واحد . انزين تذكرين لما كنا نطلع عشان نتعشى و نتأخر لي آخر الليل و أمج و أبوج يشتغلون اتصالات عليج وقتها قلتلج صكي تلفونج خلينا نلعب بأعصابهم
مريم : إي و آنا ما أدري شلون سمعت كلامك وقتها رديت البيت زفوني أمي و أبوي زف محترم كل هذا خايفين لا تلعب على عقلي و تقص علي كانوا يقولون لي لا يقص عليج و ترى إذا قص عليج ماكو عرس ما راح يسويلج عرس لو تطلع عيونج
تركي : اشدعوة كل هذا خوف مني . آنا أقص عليج عيل إنتي شتسوين ؟ إنتي تقصين على عشرة مثلي عن العيارة بس
مريم : تصدق ذكرتني و الله كانت أيام حلوة حيل حلوة أحلى أيام عمري و كل مالها أيامي تحلى معاك أصلاً آنا عمري بدا معاك
تركي : ها شرايج عجبج المطعم و الغدا
مريم : إي و الله وايد شغلهم مرتب و نظيف وأكلهم لذيذ و الله ذوقك بهالمطعم وايد حلو
تركي : أفا عليج اخترت مريم ما أعرف اختار مطعم ؟
ها حبيبتي بعد تبين شيء ؟ مشتهية شيء قبل لا نطلع ؟
مريم : لا بعد عمري كثر الله خيرك ما قصرت ونستني
تركي ينادي الجرسون : لو سمحت وين الحساب ؟
يعطيه الجرسون يدفع الحساب و يمشون

طبعاً تغدوا و خلصوا و اهمه رادين دزت آمنة مسج لمريم تقولها فيه
أول شيء لا تقولين حق تركي إني آنا اخته دازه لج مسج
و ثاني شيء ودي أمرج و أسولف معاج مثل قبل لما كنا رفيجات نسولف و نضحك مع بعض حتى أسرارنا نخشها عند بعض
متى ما طلع تركي و يبي يتأخر دق علي أمرج
بس عطيني خبر قبلها حتى لو بخمس دقايق

ترد عليها مريم أوكي حبيبتي

تركي : أقول مريوم إنتي طالعة معاي و إلا مع تلفونج ترى الحين بحذفه من الدريشة حريتيني شدعوة يبه عبرينا
مريم : تضحك اشفيك تغار علي من كل شيء . يمه منك نار . بس تدري يا حظي بحبك و غيرتك و الله من حظي مثل العسل على قلبي يبه هذي رفيجتي تقولي بمرج
تركي : يضحك شفتي محد قدج .حياها الله عالعموم عندي عرس أخو واحد من الربع و بروح عفية جيكي على دشداشتي و تكرمين جوتيي و غترتي أبي أصير معرس سوري قصدي أصك على المعرس
مريم : أخاف صج تصير معرس تبيني أذبحك و أذبح روحي وراك لا تفكر خلك خوش ريال
تركي : من صجج آنا قلت بصك على المعرس و بعدين عندي شيخة البنات و الحريم و أفكر أتزوج صج ما عندي سالفة يبه إنتي ما أبدلج لو بالذهب كله
مريم : إي جذي خلك خوش واحد . زين شوف شرايك نأجل السينما يوم ثاني ؟ مدام رفيجتي بتمرني و إنت عندك عرس أخاف ما يمدينا
تركي : حتى آنا أقول جذي إن شاء الله أعوضها لج يوم ثاني

المهم قبل لا يردون البيت راحوا اييبون لولو من أم مريم
وصلوا بيت أم مريم
أقول تركي تنزل معاي تسلم على أمي
تركي : مو مشكلة بس أخاف نطول و إنتي تدرين كل واحد فينا مشعول و ما نبي نتأخر
مريم : صدقني بس سلام ما راح نطول
تركي : يطفي السيارة و ينزل
يسلم على أمها و يآخذ لولو و يردون البيت

و لما صار وقت العرس زهبت مريم تركي من راسه لي ريله و بخرته و طلع

طبعاً مريم قالت حق آمنة إن أخوها بيطلع و يتأخر قالت لها تعالي بأي وقت

تيي آمنة طايرة ما صدقت إنه طلع و تقعد مريم مع آمنة و سوالف و طبعاً آمنة تلعب على مريم دور اللي تحبها و تخاف عليها يعني حركات حريم ما عندهم سالفة

و تتكرر زيارات و اتصالات آمنة لمريم كل ما طلع تركي أو راح

المهم آمنة مو خالية و عشان تكره تركي بمريم فكرت بسالفة السحر و راحت عند واحد يسوي سحر و قامت كل ما تروح عند آمنة تحط السحر بمكان

يعني مثلاً لما تروح مريم المطبخ تييب القهوة أو تغير للولو ترفع آمنة الكنبة و تحط الحجاب أو السحر هذي وحده

آمنة : أقول مريوم شنو أهديتي تركي بعيد ميلاده ؟
مريم : شريت له ساعة و عطر غير الكيكة و الشموع و السوالف اللي تعرفينها يعني حاولت أونسه
آمنة : ( تتعير) . أكيد استانس اهوه وايد مدحج و قال سوتلي خوش عيد ميلاد اهوه وايد يحبج
مريم : حبيبي حتى آنا أحبه أدري فيه الله يخليه لي
آمنة : (من ورا قلبها ) الله يخليكم لبعض .شرايج توريني الشغلات اللي يبتيها له إذا ما فيها تدخل بخصوصياتكم
مريم : لا عادي شدعوة حبيبتي تعالي

خذتها مريم غرفة النوم و ورتها الصورة و الساعة و العطر و قالت آمنة لمريم عطيني لولو خل تلعب مع عمتها و رفيجة أمها و عفية حبيبتي ييبيلي أدول أحس مصدعة و سويلي قهوة إذا ما عليج كلافة

مريم : أفا عليج دقايق و أييبلج اللي طلبتيه بس ديري بالج على لولو

خلت آمنة لولو على السرير و عطتها ألعابها و خذت حجاب من الحجب اللي عندها و حطته بعلبة الساعة تحت مخدة الساعة <<< طبعاً انتوا فاهمين شقصد بمخدة الساعة ؟

سمعت صوت مريم يايه شالت لولو من على السرير و قامت تلاعبها بألعابها

آمنة : مشكورة بعد عمري آنا صج ما عندي خوات بس الله عوضني بصديقة قبل لا تكون زوجة أخو طيبة و حنونة و قلبها ذهب الله يخليج لنا و الله إنج خوش جنه

يلا آنا الحين أستأذن ما أقدر أتأخر و أخلي أمي تنطرني أكثر جذي يلا حبيبتي مع السلامة

مريم : حياج الله بأي وقت بعد ما يحتاج أقولج بيت أخوج بيتج مع السلامة

رد تركي من العرس و قعدت مريم تسولف معاه قالت له آمنة مرتني و سولفت معاي و وريتها الهدايا اللي عطيتك إياهم بعيد ميلادك و لاعبت لولو آنا مستانسة أحسها قامت تحبني و تتغير من ناحيتي

تركي : غريبة . و الله ودي تتغير من ناحيتيج بالنهايه هالشيء يفرحني لما يكونون مرتي و اختي مع بعض شيء حلو

ترد آمنة لأمها طايرة من الفرحة بالنسبة لها اللي سوته إنجاز
آمنة : يمه أبشرج قدرت ألقى اللي يكره تركي بمريم و آنا توني رادة من مريم
أمها : شصاير ؟ مو فاهمة شيء ؟
آمنة : تقول لأمها عن كل شيء من لما راحت للساحر لي ما حطت السحر ببيت مريم
أمها : و أخيراً بردتي قلبي و راح يطلقها . بس شلون رحتي لمريم ؟ وما شافتج و إنتي تحطين السحر أو شكت فيج ؟
آمنة : أفا عليج آنا بنتج مو شوية لا تنسين إني كنت رفيجتها من قبل دزيتلها مسج أمثل عليها إني ودي نرد مثل قبل نسولف و نضحك يعني هالسوالف و اهيه صدقت و قالت لي تعالي و آنا رحت لها سويت اللي في بالي و رديت
آمنة : و أخيراً مريم راح ترد مثلي و يمكن ألعن مني صج آنا ما عندي ريل و عيال بس اهيه وضعها راح يكون أصعب ريلها بيطلقها و يكسر قلبها و يآخذ بنتها يتروالي اهيه اهني بتموت قهر
واااااااي يمه ماني قادرة أنطر
و يبدون يخططون شلون يورون تركي حجابات السحر بدون ما يحس إنها خطة منهم

طبعاً تمر الأيام و شهور و كل شيء على حطة آمنة ما تغير و تظل آمنة متواصلة مع مريم عشان محد يشك فيها أو تخترب خطتها و بهالفترة بدت تظهر على مريم أعراض الحمل و حملت مريم للمرة الثانية و كان تركي حيل مستانس لأن مريم حملت من ناحية و بتفكه من حنة أمه عالولد و لأن أمه و اخت صكوا الموضوع عنه و غضوا النظر عن سالفة نور من ناحية طبعاً أمه و اخته ما نسوا يترواله ما يدري عن تخطيطهم و سوالفهم
طبعاً مريم توها حامل و لما الحين ما دخلت الشهر الرابع و حايشتها صخونة

تركي : حبيبتي أوديج الطبيب صايرة صفرا أحسج مو طبيعية
مريم : لا يا قلبي ما يحتاج عادي . و زين مني من الحمل و الصخونة شوية علي أصير صفرا
تركي يلعب بخصلات شعرها يمسح على راسها و يسولف معاها
مريم : أقول حبيبي شرايك توخر عني و إلا آنا أوخر عنك يعني ما ترتاح إلا تصخن آنا لولو موخرتها عني عشان ما تصخن و أعاديها
تركي : ماني موخر عنج شنو فيج فيروس كلها صخونة عادية عادي عاديني . زين قوليلي اشحاسة فيه ؟
مريم : ما أدري لايعة جبدي و أحس كل ما برفع راسي الدنيا تدور فيني و بطيح و حدي بردانة بإختصار كارهة روحي
تركي : لا لا سلامتج عمري ما تشوفين شر . تبين أطفي المكيف دامج بردانة ؟ و إلا تدرين خليني ألحفج عدل تدفين و آنا يمج أي شيء تبين قوليلي و لا تكرهين روحج و لا شيء . بروح أسويلج كوب حليب دافي عشان تهدين و تهدى أعصابج و ترتاحين و تنامين دقايق و راد
مريم : تدري ما أحب الحليب أكره ريحته و طعمه لا تتعب عمرك و تسويلي ترى ما راح أشربه
تركي : حبيبتي مو بكيفج تشربينه يعني تشربينه دامه ما يضرج مالج حق تقولين لأ
يسوي تركي الحليب و ييبه لمريم يلا حبيبتي الحليب وصل ( يغنيلها ) يلا يا أطفال اشربوا الحليب للصحة و القوة إسألوا الطبيب
شعليج منو قدج قاعد أغني لج و الله مدللج
مريم : ( تضحك مع تعبها و حرارتها ) . وخره عني جبدي تلوع ما أحبه ما أحب ريحته
تركي : الحين بشربج من إيدي و ما تبين أفا جذي ترديني ؟ يعني بتزعليني ؟
يلا مرايم عن الدلع أدري فيج مثل اليهال تستانسين لما تعاندين و تبيني أدلعج شوفي ترى و الله أزعل إذا ما شربتيه خلي الدلع عنج
يلا آنا بغمض عيني و إنتي شربيه خليني أسويلج مثل اليهال إنتي تستانسين جذي
مريم : و الله ما أتدلع و لا أبي زعلك بس ما أحبه إنت تدري آنا عمري ما شربت حليب غير حليب أمي . مو تقول ياهل قاعد أوريك شكثر آنا ياهل
تركي : لا تنكتين ( يقعد يعدد لها منتجات و مشتقات الحليب اللي تآكلها ) شوفي إنتي تآكلين الجبن اللبنة و الككاو و الحليب و البرد كلهم حليب أو مشتقاته اشمعنة الحليب بروحه ما تشربينه ؟ و بعدين الحليب يايبه مفيد يقوي العظام و الأسنان
مريم : ما أدري بس لأنه بروحه ما أحب لا طعمه و لا ريحته و بعدين دكتور تركي آنا مابيه يفيدني آنا بدونه مرتاحة
تركي يرفع مريم و يسندها يبدي يشربها الحليب
تركي : يلا يلا شربيه كله ترى إذا وقفتي و ما كملتي راح ينكب عليج
مريم تحس بحرارة جسمها و برودة الجو و تقلبات مو طبيعية تلهث تحاول تمسك روحها ما تقدر . توخر إيد تركي و تستفرغ
يركض تركي اييب لها قلاص ماي هاج حبيبتي
مريم : شفت العناد مو فيني فيك . قلت لك ما أحبه
تركي : ما عليه حبيبتي آسف

تقوم مريم تتسبح و تغير و يحاول تركي يغير الشراشف و الأغطية
تطلع مريم من الحمام دايخة تمسك إيد الباب يآخذ عنها الفوطة و يركض لها تركي يسندها يلمها على صدره و يوديها الفراش يحبها على راسها و يلحفها

يرن تلفون تركي
تركي : وي وقته و الله مو وقته
يشوف الرقم و إلا أمه مالة و زهقانة تبي تركي يمرها يآخذها البيت عندهم ودها تغير جو عنده
تركي : يمه الحين الوقت حده متأخر شرايج تنطرين الصبح أمرج و تيين عندنا يمه مريوم تعبانة مصخنة حدها و ما أقدر أخليها أحسها حيل تعبانة تحتاجني يمها
أمه : آنا أمك شنو مرتك ؟
تركي : إنتي على عيني و راسي بس إنتي مالة و مريوم تعبانة لو كنتي لا سمح الله تعبانة كنت راح أخليها و أييج
مريم : من صجك فيك شيء أمك تبيك روح آنا مو ياهل أعرف أدبر أموري عادي صخونة عادية روح حبيبي
أمه : أسمع البرنسيسة تتكلم اشعندها ؟ شتقول لك ؟ أعرفها أكيد ما تبيك تمرني خو اهيه كلش ما تواطني لا آنا و لا آمنة . و آنا كنت بيي مع آمنة بس آمنة نايمة و مابي أقعدها
تركي : يمه شهالحجي مريم قاعد تقولي خلني و روحلها أمك أولى
أمه : إي مسكينة حبيبتي حدها حنونة المهم خلصني أنطرك يلا مع السلامة
تركي : يحبها على راسها و يلحفها ديري بالج على روحج يبه و آنا إن شاء الله ما راح أتأخر غمضي و فتحي تلقيني عندج يعني بس مسافة الطريج . ها بابا تبين شيء قبل لا أروح ؟
مريم : لأ سلامتك . الله وياك و الملائكة تحرسك

راح تركي متنرفز ما وده يخلي مريم بس تدرون أمه

المهم راح و رد و ياب أمه . أمه قعدت بالصالة تنطر

تركي : راح لمريم و اهيه غافية و منسدحة . حبيبتي . أمي يت و آنا قلت لها إنج تعبانة خليج مرتاحة و اهيه تدري إنج حامل آنا عندها
مريم : من صجك حدها فشلة أمك عندنا و آنا نايمة الصخونة و الحمل مو حجة و آنا مو أول مرة أصخن أو أحمل عادي متعودة خلني أقوم أزهب لها فراشها و دارها

تقوم من السرير
تركي : مريم ليش قمتي من السرير ؟ إنتي مو تعبانة ؟ روحي ارتاحي أمي تدري إنج تعبانة و عاذرتج
مريم : تركي لا تضايقني خلني على راحتي آنا مرتاحة جذي
تحس بألم براسها آآآآآآآآآآآخ
تركي : اشفيج بابا عسى ما شر ؟
مريم : راسي راسي يعورني و بينبط
تركي : يروح يدور لها أدول و ييب لها قلاص ماي و يعطيها . مريم قولي بسم الله الشافي العافي
مريم : بسم الله الشافي العافي . مشكور حبيبي . تقوم من مكانها بتروح لخالتها
تركي : يا يبه يا حبيبتي ارتاحي مو قلتلج عن العناد مو زين عليج
مريم : ما فيني شيء بس صداع عادي و آنا الحين خذيت أدول و إن شاء الله أصير أحسن
( مع احساسها بدوران الدنيا فيها و فقدانها لتوازنها ) طلعت الصالة هلا هلا خالتي هذي الساعة المباركة اللي تيينا فيها
أمه : إي . هلا هلا . يقول تركي مريضة سلامتج و مبروك على الحمل
مريم : الله يسلمج من الشر والله يبارك فيج خليني أزهب دارج و إخذي راحتج البيت بيتج
تركي : خليني أساعدج
مريم : شدعوة شبسوي كله فراش و بفرشه
تركي : لا تعاندين إنتي مصخنة و مصدعة وحامل و مابي الجنين يتأثر و هم مابي أتعبج خليني أساعدج
مريم : اللي يشوفك يقول الجنين معلق بس أتحرك راح يطيح . تدري شلون على راحتك اللي تشوفه و مثل ماتبي

نظفوا الغرفة و زهبوها و افرشوا السرير و بخروا الدار

نزل تركي لأمه يلا يمه كل شيء زاهب تفضلي حياج الله

تصعد أمه جدامه و يشيل أغراضها وراها

تدخل الدار و تشوفها
أمه : و الله حليوة زينة
مريم : خالتي بعد تبين شيء ؟ ناقصج شيء ؟ محتاجة شيء ؟
أمه : يعني شبي منج و شبيكون ناقصني و محتاجته منج ؟
تركي : مشكورة حبيبتي روحي ارتاحي

يقعد مع أمه شوية يسولفون و بعدها تقوله أمه روح لمرتك آنا تعبت بنام
تركي : زين يمه تبين شيء قبل لا أروح

أمه : لا يمه و لاشيء سلامتك
تركي : عيل تصبحين على خير
أمه : تلاقي خير
يطلع تركي و يخليها بناء على طلبها و رغبتها و يروح داره ينام

تقعد أمه عندهم 3 أيام و قبل رابع يوم تطلع أمه و تهد البيت و اهمه نايمين و بدون ما تترك لهم أي خبر إنها بتطلع

قعد الصبح تركي يدرو أمه كعادته يبي يتريق معاها ما لقاها

قعد مريم سألها : وين أمي مو في البيت شفتيها ؟

مريم : لأ ما شفتها و لا أدري عنها آنا طول الليل نايمة يمك ما تحركت
انزين شوف دق عليها و إلا على آمنة

تركي يدق و تشيله آمنة
هلا آمنة ها عسى ما شر أمي وينها قعدنا ما لقيناها
آمنة : إي قبل الصبح يعني عالفجر أمي دقت علي و كانت وايد متضايقة و منعفسة و قالت لي تعالي اخذيني و من الفجر لي الحين أمي قافلة على روحها الباب و مو راضية تفتح أو تكلمني أو حتى ترد علي و يوم خذيتها منكم كانت ترجف و خايفة
تركي : شنو ؟ شالسالفة ؟
آمنة : ما أدري علمي علمك
تركي : يلا يلا آنا الحين ياي

يسد التلفون يبدل ملابسه يآخذ مفاتيحه و يطير لبيت أمه

يتبع ...
to be continued ...

عذروني طولت عليكم وايد بالجزء الثاني قبل الأخير

بس إن شاء الله الجزء الثالث و الأخير بيكون حيل مختصر و قصير لأنها النهاية لهالقصة

سلامي لكم :)

عندما يموت الإنسان وهو حي ... فاصل و بعدها نواصل

عندما يموت الإنسان وهو حي

صباح الخير / مساء الخير للبلوقرز و العموم

في البداية

كنت مثل ما وعدتكم راح أحط الجزء الثاني قبل الأخير من قصة مريم و تركي
بس في شيء أهم من القصة
إي لا تستغربون شيء أهم من القصة حال البلوقرز الأعزاء الكل متضايق و الكل مهموم و الكل شايل الدنيا فوق راسه
كل ما أزور بلوق أرد على بوست أيي اليوم الثاني أشوف بلوق ثاني كاتب نفس السالفة بطريقة ثانية الحين صارلي أدخل ثلاث بلوقات كلهم مثل السالفة و القضيه الكل يشكي من الهم و الحزن و الضيق و اللي يبي ينتحر و اللي يبي يموت و بصراحة هالشيء يضايقني و يضيق خلقي عليهم آنا أحس إن علاقتي مع البلوقرز عايلة وحده مو مجرد أشخاص بس أرد عليهم و أمشي
فمن هالمنطلق حبيت أحط فاصل إعلاني قبل لا أكمل الجزء الثاني قبل الأخير

عندما يموت الإنسان وهو حي

ليس بالضرورة أن تلفظ أنفاسك
و تغمض عينيك و يتوقف قلبك عن النبض
و يتوقف جسدك عن الحركة كي يقال
عنك أنك فارقت الحياة
فبيننا الكثير من الموتى
يتحركون
يتحدثون
يأكلون
يشربون
يضحكون
لكنهم موتى .. يمارسون الحياة بلا حياة
فمفاهيم الموت لدى الناس تختلف
فهناك من يشعر بالموت حين يفقد إنساناً عزيزاً
و يخيل إليه إن الحياة قد انتهت
و إن ذلك العزيز حين رحل
أغلق أبواب الحياة خلفه
و إن دوره في الحياة بعده قد انتهى
و هناك من يشعر بالموت حين يحاصره الفشل
من كل الجهات و يكبله إحساسه بالإحباط عن التقدم
فيخيل إليه إن صلاحيته في الحياة قد انتهت
و إنه لم يعد فوق الأرض ما يستحق البقاء من اجله
و البعض
تتوقف الحياة في عينيه في لحظات الحزن
و يظن أنه لا نهاية لهذا الحزن و إنه ليس فوق الأرض
من هو أتعس منه فيقسو على نفسه
حين يحكم عليها بالموت بلا تردد
و ينزع الحياة من قلبه ويعيش بين الآخرين
كالميت تماماً
فلم يعد المعنى الوحيد للموت
هو الرحيل عن هذه الحياة
فهناك من يمارس الموت بطرق مختلفة
و يعيش كل تفاصيل و تضاريس الموت
و هو ما زال على قيد الحياة
فالكثير منا
يتمنى الموت في لحظات الإنكسـار
ظناً منه إن الموت هو الحل الوحيد
و النهاية السعيدة لسلسلة العذاب
لكن
هل سأل أحدنا نفسه يوماً
ترى ماذا بعد الموت ؟
نعم
ماذا بعد الموت ؟
حفرة ضيقة
و ظلمة دامسة
و غربة موحشة
و سؤال .. و عقاب.. و عذاب
و إما جنة .. أو نار
فهم .. كانوا هنا
ثم رحلوا
غابوا و لهم أسبابهم في الغياب
لكن الحياة خلفهم ما زالت مستمرة
فالشمس ما زالت تشرق
و الأيام ما زالت تتوالى
و الزمن لم يتوقف بعد
و نحن ما زلنا هنا
ما زال في الجسد دم و في القلب نبض
و في العمر بقية فلماذا نعيش بلا حياة
ونموت... بلا موت ؟
إذا توقفت الحياة بأعيننا فيجب أن لا تتوقف
في قلوبنا
فالموت الحقيقي هو
موت القلوب

أتمنى أكون ببوستي هذا منحتكم الأمل و ساعدت بالتفريج و لو بجزء قليل من همكم

و الله يفرج هم كل واحد و يبعد عنكم الحزن و الهموم

سلامي لكم :)

مريم و تركي ... قصة من تأليفي

تركي و مريم قصة من تأليفي راح تلاحظون الدقة في التفاصيل و الأحداث طبعاً هالدقة و التفاصيل علشان أصور لكم القصة لأنكم راح تعتمدون على عيونكم و خيالكم أكثر من أي شيء ثاني فالدقة في التفاصيل علشان تتخيلون معاي القصة و تعيشون أحداثها
تركي و مريم زوجين من أروع ما يمكن عايشين بسعادة و هناء صارلهم سنتين زواج نتج من هالزواج ياهل كتكوتة أمورة اسمها لولو
مريم كل شيء بحياة تركي و تركي كل شيء بحياة مريم مو بس أزواج أكثر من أزواج و حبايب و أصدقاء
و طبعاً كل حياة ما تخلى من المتاعب و المشاكل و الهموم بس هم عن هم يفرق و مشكلة عن مشكلة تفرق مابي أطول عليكم أبيكم تشوفون و تتابعون الأحداث بنفسكم

بداية صباح و يوم يديد

مريم : صباح الخير عمري
تركي : صباح النور حبيبتي
مريم : يلا قوم وراك دوام يا حلو
تركي : تو الناس باقي ساعة حدج مستعيلة علي تبين الفكة ؟
مريم : حرام عليك قعدتك عشان تصحصح و تقعد معاي شوية قبل لا تروح
تبدي لولو بنتهم الصغيرة تبجي توها قاعدة حدها متعسرة
تركي : صباحج الصباحي و الورد و التفاحي لولو حبيبتي قعدت
مريم : قبل لا تجلب فيني لولو شتبي أسويلك ريوق شنو مشتهي حبيبي ؟
تركي : ما أدري مو مشتهي شيء بس شرايج تسوين لي قهوة من إيدج الحلوة قبل لا أروح الدوام
مريم : العب معاها شوية على ما أسويلك القهوة لولو عاقدة النونة محد راح يعدل مزاجها غير
أبوها حبيبها
تركي : أفا عليج ألعب معاها آنا عندي أغلى منها
مريم : أفا و آنا وين رحت ؟
تركي : شدعوة تغارين من لولو يبه إنتي راس المال كله حبيبتي إنتي
مريم : جذي رضيت حط في بالك كل ما تقول للولو كلمة تقولي بدالها و غيرها عشر ترى آنا حيل أغار
تركي : ولييييه إذا جذي ما راح نخلص بس تدرين إنتي مرتي و حبيتي و تستاهلين الغلا و الحب كله دامج مدللتني و مرضيتيني أعطيج عيوني مو بس كلام حلو
مريم : حبته و لمته الله يخليك لي و لا يحرمني منك
مريم : أقول تركي حبيبي شرايك قبل لا أسويلك القهوة تسبح معاي لولو مدام قعدت شرايك تساعدني ؟
تركي : خليني أشوف يمديني و إلا لأ . اممممم جدامي ساعة إلا ربع يمدي يلا
مريم : تركي يسبح لولو و الله إنج غالية عنده . تركي افتح الماي خله دافي مو بارد تتجمد و لا حار تحترق
تركي : حلفي صج عبالي إنا بنحرقها أو إن احنا بمسلخ و بنسلخها
مريم : تضحك يلا عاد عن الغشمرة حدك فاضي يلا ييب الشامبو تصدق ماني قادرة أمسكها أحسها بتزلق و تطيح من إيدي
تركي : يمه يا عيارة البنات ما تعرفين تمسكين ياهل يبيها عنج لا تطيح يلا يلا خلاص يبي الفوطة خل نطلعها
مريم : هاك ييبها عنك عاد الحين خلنا نلبسها
تركي : مو جنج مصختيها شوية و قزرتيها علي؟
مريم : كيفك آنا حبيت أعلمك
تركي : يضحك ليش قالولج ناوي أصير بيبي سيتر لا سمح الله؟ تدرين يلا علمينا
مريم : امسك إيدها خلني أدخل جمها دير بالك شوي شوي لا تنفصخ إيدها
لولو تبجي و تركي ( يسكتها ) لا لا حبيبتي لا تبجين بس بس ( يغني لها ) لولو لولو الصغيرة لولو لولو حبيبتي
لولو تطالعه و تهدى و تسكت
مريم : يحليلك و الله شاطر لا لا صكيت علي تنفع بيبي سيتر
تركي : مريوم هاج مسكي بنتج باقي ربع ساعة خليني أتسبح عشان أطلع
يلا و آنا ثواني و قهوتك عندك
تسبح و طلع قعد يلعب مع لولو
تركي : لولو قولي بابا
لولو : دادا أغوا
تركي : لا لا بابا
تطلع مريم من المطبخ تيبله القهوة و ترد عليه حدك مستعيل تو الناس عليها على بابا اهيه أول خل تقول ماما علشان تقول بابا
تركي : و شالفرق يعني كله حرف و كلنا واحد
مريم يت صوبه و يابتله القهوة
تركي : يا أرض احفظي ما عليكي حبيبة قلبي حضرت و معاها قهوتي
مريم : تضحك ترد عليه يا أرض احفظي ما عليكي اليوم طالع قمر . تفضل قهوتك اشدعوه كل هالكلام على قهوة يالعيار عطني لولو لا تحرقها و اشرب قهوتك لا تتأخر
تركي : أفا آنا عيار كيفج عيار عيار . الله شهالقهوة الحلوة صج الحلو ما يطلع منه إلا الحلو و الزين
مريم : تضحك خلاص يبه آنا العيارة و لا تزعل كلش و لا زعلك عاد اليوم لازم تستانس و ما أبيك تزعل اهوه صج كل يوم ما أبيك تزعل و أبيك راضي علي بس اليوم غير
تركي : اشمعنة اليوم يعني ؟
مريم : بعد جم ساعة راح تعرف ليش
تركي : وييييه يعني انطر
مريم : انطر حبيبي ليش ما تنطر وراك شيء ؟
تركي : لأ . ننطر على قولتج شوراي ؟ . يالله حبيبتي مسكي بنتج خليني أشرب قهوتي بروح تأخرت
مريم : ييبها بس عفية قد ما تقدر لا تتأخر
تركي يحط قهوته يحب مرته و بنته على راسها و يطلع
مريم : عفية دير بالك على روحك
تركي : إن شاء الله بس قبل لا أنسى اليوم بتأخر شوية بعد ما أطلع من الدوام بمر أمي تدرين صارلي اسبوعين مو مارها تيين معاي ؟
مريم : حبيبي ودي بس اليوم لأ ما أقدر إن شاء الله يوم ثاني
تركي : اليوم و اليوم ما أدري شعندج الله يستر خلاص عيل على راحتج يلا مع السلامة
مريم : يعني مريوم شبيكون عندها غير الخير مع السلامة
طبعاً اليوم عندها عيد ميلاد ريلها و إعداداتها لعيده من أروع ما يمكن
تركي خلص دوامه و بطريجه لأمه مر أمه و سلم عليها و حب راسها أمه شكلها حدها تعبانة
تركي : يمه عسى ما شر اشفيج تعبانة في شيء يعورج أوديج الطبيب
أمه : لأ الدكاترة ما عندهم علاجي . علاجي عندك إنت دائي و دوائي
تركي : أفا عليج يمه باللي تآمرين عليه ماي عيوني شوية عليج
أمه : خلاص عيل مدامك قلتلي آمري آنا صرت أحسن شوف حبيبي إنت تدري إنك ولدي و أحبك و كل أم بهالدنيا تبي مصلحة ولدها صح آمنة <<< طبعاً آمنة اخته الوحيدة اي يمه و اللي يقول غير هالكلام ما عنده سالفة تركي : يالله يمه قولي حيرتيني
أمه : طول بالك إنت تدري إن عمة أبوك متزوجة إماراتي و ريلها مات و بنتها نور بدون و قاعدة عندي و محد يتقدملها إلا إمارتيين و إنت أدرى بالحال أمها كويتية و بنتها بدون و آنا أبيلها كويتي أمها ما تبي قصتها تنعاد إنت تدري اهيه شكثر تبهذلت مع بنتها و آنا أبيك تآخذها لأنك كويتي على الأقل بس تآخذ الجنسية و بعدين كيفك
تركي : يمه مستحيل آنا ما أبي غير مريم و لا أقدر أعيش مع وحدة غير مريم آنا أحبها و اهيه أحسن و أروع زوجة ما قصرت معاي و ما شفت منها إلا كل خير لا تحاولين و لا تفكرين أصلاً أحط على راسها شريجة تحرها مستحيل مريم ما تستاهل مني أحرها و بعدين وين مصلحتي اللي تبينها بالهالموضوع كله ؟
آمنة : يبه شفيك ما قلنالك طلقها قلنا تزوج نور خل تآخذ الجنسية و اهيه أصلاً ما تبيك و لا تبيك تقرب منها اهيه بس تبي الجنسية خلها تآخذها و بعدين كيفك طلقها علقها على راحتك ؟
تركي : شتبي بالجنسية اهيه مو ناقصها شيء و اللي تبي أعطيها تبي فلوس تبي وظيفة اللي تبيه أسويه لها بس زواج لا تحلم
أمه : لا اهيه ما تبي لا وظيفة و لا فلوس اهيه تبي ولد لا جار الزمن عليها تلقاه يمها يشيلها و يدير باله عليها و هم الجنسية تفيدها كافي إنها راح تآخذ كل حقوقها و ما راح تحتاج لأحد
تركي : توج إنتي و آمنة تقولون بس تبي جنسية صار الحين تبي ولد ؟ شهالحجي ؟ و توها آمنة تقول اهيه ما تبيك و لا تبيك تقرب منها ما تقولون لي شهالتناقض بكلامكم ؟ و بعدين وين مصلحتي اللي تبينها بالهالموضوع كله ؟ اسمحيلي يمه
إنتي و بنتج بتخربون بيتي
آسف سامحيني يمه آنا طول عمري أسمع كلامج بس هالمرة آنا آسف ما أقدر إنتي ما تدرين آنا شكثر أحب مريم و شكثر مرتاح معاها
أمه : لا تتسرع و بعدين مرتك يابتلك بنت مصلحتك يا حبيبي تتزوج و تييب ولد ؟
تركي : بنتي لولو و مرتي مريم عندي بالدنيا كلها و الولد متى مايه حياه الله و إذا كنت أبي ولد فآنا أبيه من مريم و بعدين تو الناس علينا العمر جدامنا و بعدين منو قالج إني أبي ولد آنا جذي الحمدلله مرتاح
آمنه : شنو ساحرتك ؟ صايرلها محامي دفاع
تركي : لا ساحرتني و لا شيء اهيه مرتي و مو عيب أدافع عنها و بعدين آنا أحبها و اهيه تحبني و الطرف الثالث اللي بتدخلونه كلش ماله أي داعي مرتي ما يعيبها أي شيء عشان أتزوج عليها يعني الكويتيين و الخطابات الله ما كثرهم بالديرة شنو يعني ماكو غيري الرياييل خلصوا مثلاً ؟ و بعدين يا آمنة لو كنتي متزوجة ما كنتي راح ترضين ريلج يآخذ عليج كنتي راح تحرقين الدنيا فيه عدل
آمنة : سكتت
أمه : أعطيك مهلة اسبوع فكر على راحتك و قول لمرتك إذا حاب و إذا مو حاب و ما تبي تقولها تخاف على زعلها آنا أزوجك من نور و اهيه ما تدري و إنت كل ما تمرني تروحلها إنت تدري نور و أمها قاعدين عندي و وعد مني و من اختك آمنة و نور و عمة أبوك كلنا ما راح نقولها و لا راح تدري كلش و لا زعلها معزتها و غلاتها من معزتك و غلاتك
و بعد الإسبوع إن ما رديتلي خبر لا تييني و لا تمرني و لا إنت ولدي و لا أعرفك
تركي : متضايق يا ليتني ما مريت . يمه آنا تأخرت دني يمها حب راسها يلا يمه مع السلامة
أمه : لا تنسى فكر باللي قلته لك الله وياك

تركي راد بالطريج لبيته حده متكدر و متضايق أمه و اخته و سالفة نور عفست مزاجه

دقت عليه مريم : ألو ها حبيبي وينك تأخرت عسى ما شر

تركي : هلا هلا لا ما شر بس كنت عند أمي و تدرين قعدة و سوالف كاني بالطرج إن شاء الله ثواني و أكون عندج

مريم : ما أوصيك سوق عدل و دير بالك على روحك

تركي : إن شاء الله يا كثر ما تحاتين

مريم : بعد أحبك و أخاف عليك . ناطرتك يلا مع السلامة

تركي : مع السلامة

و بهالفترة
مريم سبحت لولو و نومتها و زهبت العشا لتركي
زهبت الشموع و انثرت ورد بكل مكان و يابت الكيكة حتى صورته ودتها لمحل يرسمونها و اشترت له العطر اللي يحبه و أغلى ساعة و كل شيء زاهب بس تنطر ييته

طبعاً المشكلة بكل السالفة أمه و اخته و كونه وحيد أمه يزيد عقدة المشكلة و كون اخته ما تحب مريم و مو متزوجة فهذا يعقد السالفة أكثر و أكثر بقية الأحداث و التفاصيل في البوست القدم إن شاء الله

يتبع ...