عين الحسود فيها عود ؟

مساء الخير لأحلى مدونجيه :) و كتاب بوستجيه :)و يسعد مساكم دوم مو يوم :)
عندي لكم هالسالفه واقعيه و حقيقيه بس الاسماء مو حقيقيه مستعاره :)
السالفه عن الحسد و الحساد و ان شاء الله تعجبكم
الحسوده : مريم

يارتنا : عايشه
اليوم زارتنا وحده ينقالها مريم و اختصرت علي طريج التفكير في كتابه سالفه لكم هالوحده خوش وحده اهيه اكيد مو من الاهل لكنها يارتنا و الله انها خوش وحده طيوبه و حبوبه بعمر امي و صديقتها الروح بالروح لكن اكتشفنا فيها عيب حده خطير اخطر من اسلحه الدمار الشامل اكيد كل واحد بيقول فيكم شدعوه وايد يبالغ بقولكم لا و الله لان عندها عين ما شاء الله عليها وحده بوحده و شيء مو طبيعي :) انسى تذكر اسم الله على شيء يعجبها لو شنو ما صار مو عن شيء بس اهيه تعودت تحسد و المشكله امي تعزها وايد ؟
طبعا احنا ما كنا ندري عنها انها حسوده و اكتشفنا هالشيء من مجموعه سوالف ؟
من قبل جم سنه تقريبا جي 95 او 96 كان عندنا سياره ببيتنا فان دايما ابوي يصفطه بالكراج لانه بس للطلعات العائليه بس شافتها تدرون شقالت ؟قالت : اخ يا توايرها عليهم عقارب ؟ توه ابوي طالع بيوديها سيرفز و الا اربع توايرها يبنجرون ؟ و الله ما ابالغ بنجرت السياره و مو تاير و الا اثنين اربعتهم ؟
المهم محد انتبه عليها
و في مره من المرات كانت معزومه عندنا و اختي قاعده تسوي سلطه و بيدها خياره تقطعها جان تقولها خوش سلطه قاعده تسوينها و الله ما كملت كلمتها الا ايدها انجرحت و الدم صب صب منها ؟ الله و اكبر عليها وحده بوحده
و هم محد انتبه مو غباء او قله انتباه لأ لانها معانا جم سنه و ما شفنا او لاحظنا منها اي شيء بالعكس على قولة امي اخت دنيا ؟
و في مره كانت يايتنا و كان ابوي يايب لامي كل شيء يعني فواكه و فطاير و حب و كيك كل شيء تخيلوا بس سووا جاي و قهوه جان تقول لامي : ابوعيالج خوش واحد مو مخلي عليج قاصر ؟ما طلعت من البيت الا و اهمه ما يتواطنون ؟
المهم و سوالفها كثرت و شكينا فيها لاحظوا على كل سوالفها و شك بس محد متيقن انها بالفعل تطق عين ؟ لان الوالده حيل تعزها و تحبها و ما تحب احد يقول عنها اي شيء
عاد المهم في يوم كانت امي مسيره على يارتها عايشه و الا امي تقول و انا قاعده و ياها ما ادري شنو اللي خلاني افتح موضوع الحسد ؟ تقول و الا عايشه اتيب طاري مريم و تقول انها حسوده و حسدتني و عينها حاره و عينها و لا القبر امي قالت لها شلون رفيجتي مريم حسوده ؟ قالت لها انا اقولج تخيلي يا أم --- بنتي حدها شاطره بالانجليزي و اهيه تدري انها شاطره تقول عاد في يوم بنتي راده من المدرسه و الا يايبه الدرجه النهائيه ماخذه علامه كامله بالانجليزي و حدها مستانسه فنست ان مريم حسوده قومي و وريها درجتج عاد مريم عينها طلعت لانها و بناتها مو ذاك الزود بالانجليزي عاد من زود ما طلعت عينها على الدرجه ما قدرت تسكت الا و قالت بل اثاريج شاطره على منو طالعه؟ اهيه قالت بل يا ام ---- بنفس اليوم عيون بنتي تتفخوا و حمروا و صارت عيونها تخرع وديتها الطبيب و الا يقولون لي رمد ربيعي ؟تقول ثاني يوم شسويت عزمتها الصبح على شاي الضحى و خذيت من الماي و الجاي اللي شربته و غسلت عينها و الله لو شايفتها تقولين جذابه ردت على طول زينه و ما فيها شيء ؟امي قالت لها معقوله مريم يطلع منها كل هذا ؟عاد عايشه قالت لها : شدعوه عليج كل زياراتها لج و الصحبه اللي طاقتها معاها و ما لاحظتي ؟امي : انا الاحظ تصير شغلات عين و ما عين بس ما توقعت انها حسوده و عينها حاره ؟ حدي ما لاحظت ؟
و في يوم شافت اختي قاعده بالدار تشتغل على اللابتوب جان تقولها : انتي شحاطه بويهج ؟قالت لها : و لا شيء مريم : حلفي ؟قالت لها : و الله مريم : ويهج اصفى من الصفا نفسه ؟عاد اختي ينت قال لامي خليها تقول ما شاء الله لا ايصير بويهي شيء مو ناقصه بعد ؟المهم ما قالت بس طلعت و الا ويه اختي ينشف و يقشر و يحمر اعتفس فوق تحت وديتها الطبيب طلعت اكزيما حدي استغربت شياب طاري الاكزيما ؟ و تذكرت عين مريم
و خلوني ازيد لكم من الشعر بيت مره كنت راد من الدوام بدلت و غسلت و على طول طلعت بروح النادي بالعب سله عاد شافتني قالت لي : مداك ترد رايح تلعب شباب شباب قلت : وليه من له خلق حسد الحينقالت لي : شتلعب قلت لها : سلهقالت عاد انت : طول و وسامه مو ناقصك شيء ليش تلعب سله قلت لها : هوايه قالت لي : جسمك حده توب ؟بالسياره قاعد افكر و حدي مستغرب ما صار فيني شيء عند الباب عاد قلت لنفسي شكلها طخت و عينها ما قامت تصيب عدل ؟
حسدت روحي رحت العب سله و انا العب و قاعد اناطط و اقوم انقلب و اتكسر انكسرت ريلي عاد صارلي اسبوع بس مجبس حسبي الله عليها من مره ؟
جد و الله هالمريم حسوده بشكل ما تتصورونه على اي شيء تحسد كبير صغير سخيف مهم تافه المهم تحسد و بس صدقوني ما ابالغ بالفعل هالاشياء صارت و كتبتها لكم و في اشياء صارت و كتبتها حتى ما اطول عليكم اكثر من جذي
عاد عقب ما امي تيقنت عدل من عينها و عرفت انها حسوده قامت تخاف تقول اي شيء عنا جدامها صغير و الا كبير صج امي ما زعلت عليها و لا تضايقت منها لان على قولتها مو مشكلتها اذا اهيه حسوده ؟ قلت لها يمه شدعوه مو مشكلتها على الاقل خليها تقول ما شاء الله اهيه الله كلش ما تذكره ؟
ادري بتقولون شالله حادكم تكلمونها و تدرون انها حسوده بقولكم : هذي امي و ما اقدر اقولها اي شيء الا سمعا و طاعه و هم ما الومها رفيجتها من عمر :)
تدرون شنو اللي لاحظته بطبيعتنا كبشر ؟لاحظت ان احنا لو حبينا اي احد و عزيناه ما نشوف فيه ذره عيب كله نشوف كامل الاوصاف و العيوب بعيده عنه معنى انه يا كثرها فيه يعني الواحد ينعمي عن عيوب الحبيب و يشوف حبيبه او صديقه او اي احد يغليه و يعزه احسن واحد و كامل الاوصاف و ما فيه ذره عيب
يعني الحين شوفوا امي الله يخليها لي و يحفظها معنى ان صديقتها احسدتنا حسد بقينا نموت منها بس الله ستر علينا و امي ما تركتها مو علشان شيء لانها تحبها و تعتبرها اخت دنيا
شرايكم تتفقون معاي بهالنقطتين ؟
المهم بعد اللي قلته لكم ابي اعرف شغلات منكم ؟
شرايكم بهالمثل ؟عين الحسود فيها عود :)

و لو الواحد فينا حب واحد مع عيوبه او انعمى عن عيوبه لحبه له هل هو غباء منه لا سمح الله ؟ و الا حب اعمى

و هل انتوا تؤمنون بشيء اسمه عين أو حسد ؟

و شرايكم بسالفه اذا الواحد حسدك اخذ من أثره يعني مثلا ماي او جاي او عصير اخذ اي شيء بقى من اللي شربه ؟ يعني جربتوها ؟

ابي ارائكم بهالبوست و ردودكم و هل في مواقف صارت لكم ؟ و تعلمتوا منها ؟

في النهايه حبيت اذكركم انكم ترقون روحكم خصوصا اذا كنتوا من النوعيه اللي العين تطقهم بسرعه :)

أو حتى حلوين يالبنوتات او فيكم وسامه يالشباب و مو لازم الحلى يمكن تكون عندك هوايه او شهاده او صنعه او حرفه او اي شيء يخلي هالناس تحط عينها عليك و تحسدك خو هالناس مو مخلين احد بحاله يعني الواحد علشان روحه و نفسه ما يخسر اذا قرا المعوذات و قال : اعوذ بكلمات الله التامه من كل شيطان و هامه و كل عين لامه اعوذ بكلمات الله التامات من شر ما خلق بسم الله الذي لا يضر مع اسمه شيء في الارض و لا في السماء و هو العزيز الحكيم قولوها 3 مرات و الله يبعدكم و يبعدنا عن العين و الحافظ الله :)
و بس يا عسلز :)
سلامي لكم :)

قال خرف مبكر قال ؟

يدت الفريج اشحلوها و اشحلوا سوالفها يدتي و يدت كل واحد بفريجنا طيبه و حنونه لا رحت الصبح الدوام لقيتها تتمشى يم الطوفه لابسه بوشيتها تروح الفرع تيبلها اغراضها و اغراض لعيال ولدهاما شفنا منها الا كل خيرلا صار عيد و الا رمضان و الا قرقيعان لقيناها اول وحده يايتنالا طحنا و الا صار فينا شيء لقيناها اول من سال عنامره مسكينه و حبيبه عايشه عند ولدها و مرته الغشره لكن وراها جنه الله لا يراويكم شرها و ظلمها و عندها ولد سكانه مرته شويه عليه تجره مرته وراها و يمشي
في يوم من الايام فقدنا طلتها علينا فقدناها ما سالت علينا و لا قالت وينا

قلت للوالده : ها وينها ايديده صارلها مده ما شفناها و لا شافتنا
قالت لي الوالده : تصدق صارلها جم يوم ادق عليها يقولون لي راحت المستشفىحتى الخدامه لما ايي الصبح بيت ولدها و اسال عليها تقولي راحت المستشفىمراجعه اشك بكلامها احس موصينها
مرت الايام و الايام لين وصل الشهر
و قلت للوالده يلا دقي عليها نبي نشوف اخبارها و نتطمن عليها شكلها فيها شيء ؟

قالت لي : ان شاء الله الحين

قلت لها : اخليج على راحتج بروح النادي و ارد علشان اسمع اخبارها

قالت لي : الله وياك
رحت النادي و رديت و شفت امي مغلقه تغلق الدنيا ضيقه الخلق و ضيقه الصدركلها فيها
قلت لها : عسى ما شر يالغاليه ؟
قالت لي : دقيت على ايديده و شالت التلفون جنتها و قلت لها ها شلون الحجيه

قالت لها الجنه : الحجيه تعبانه حيل و مريضه

قالت لها الوالده : اقدر ازورها و اتطمن عليها

قالت لها الجنه : لأ ما يصير ولدها مانع الزياره عنها ليشان حايشها خرف مبكر ؟ <<< اشكره جذي ترد صج ما تستحي المهم قلت لها : لا لا تقولين اهيه ما فيها شيء هذا اكيد ولدها و مرته اهمه اللي سووا فيها جذي طبعا انا قلت هالكلام مو عبث او لهو لانها دايما تشتكي منهم و من اذاهم لها
صكت الدنيا فيني و في امي هذي الحجيه غاليه علي صدقوني حتى انا اناديهايدتي من كثر ماهي طيبه و خوش مره
بدايه الاسبوع
انطرت الوالده جنتها تروح الدوام ليش انها تمنع الزياره عنها و هي موجوده ما ترضىاحد يزورها و راحت الوالده لهاكلمت الخدامه بالانتركم و ما نفع ما رضت تفتح الباب لهم تكلمهم من وراالباب موصيتها الحيه
المهم ثاني يوم راحت اختي و نفس الشيء ما رضت تفتح لها الباب
بعد جم يوم خذيت لي اجازه ليوم واحد ورحت قلت ماني مخليهاالا داخل و شايف اشفيها
رحت مع الوالده و اختي بعد ما راحت الجنه دوامها و افتكينا من شرهاخدامتها تتكلم انجليزي عشتو و لازم اتفاهم معاها بالانجليزيعاد مو وقته فلسفه من الصبح مو فاضي خخخخ
المهم
كلمت الخدامه بالانتركم قلت لها : good morning

قالت لي : good morning sir

قلت لها : can i talk with u plz ?

قالت لي : what a bout ?

قلت لها : i will never talk if u do not open the door to me ?

قالت لي : aha ok

قلت لها : i want to ask about ---- ? what about her ? can i see her ?

قالت لي : of course no

قلت لها : why not

قالت لي : the mom told me not to open to any one to visit her because she is to sick and she need to be relax

قلت لها : listen h come from far away area & i will never go if i donot let me see her ? <<< يخلون الواحد يجذب من الصبح اي فاراوي خخخ قالت لي

قالت لي: no way

قلت لها: listen plz i will never do any thing i want just to talk with her behind the door i will never enter i swear ?

قالت لي : ok

قلت لها : thanks very much :)
دخلت و يا ليتني ما سويت كل هذا و دخلت مسوين لها ببيتهم اصغر مكان بالحوش و حاطينها فيه غرفه آآآآآآخ من غرفهما شفتوا ظلامها و لا ضيجها و لا مكانها وين و لا شلون ؟ :(
الباب في جام علشان تشوف اللي بالغرفه و الجامه مظلمينها ما تقدرتشوف اللي داخل و لا اللي داخل يقدر يشوفك :(
وقفت و را الباب مثل ما قلت للخدامه
و صرخت ديده ام ---- ديده ام ---- ما تسمعني :(
نزلت الوالده من السياره و اختي بيشوفونها يحسبوني دخلت
يوم نزلوا و الا ولدها ياي من دوامه و شافنا
قال لي : يا هلا

قلت له : هلا فيك

قال لي : خير

قلت له : الخير بويهك <<< ما ظنتي و الله بويهه خير ها عسى ما شراشفيها امك ؟ شوفوا اشطلع و اشسوى فيها و اهيه احسن منه و مني الف مره

قال لي : ابد و الله بس الوالده حاشها خرف مبكر ؟

قلت له : شلون ؟ حاشها ؟ شنو اهوه فيروس و الا انفلونزا شنو حاشها ؟

قال لي : بعد هذا اللي صار لها قلت لها : و شلون صار ؟

قال لي : انها قامت تكمش شعرها و تعض ايد الخدامه و تكسر الاغراض و تعفس الدنيا ؟ و بعدين و لا جنها سووت شيء ؟

قلت له : و شلون حالتها الحين

قال لي : حاطينها بغرفه و قافلين عليها ؟ الدكتور وصانا لانها صايره وايد تخرف و تطلع و ما ادري وين تروح المهم ما بقى شيء ما طلع فيهاو اهيه آآآآآآآآآخ و ربي ما كان فيها شيء ؟

قلت له : لا حرام ليش تقفل عليها ترى اهيه روح و تحب الارواح ؟

قال لي : بعد شنسوي امر الله و انا قاعد ابرها ؟

قلت له : قول امين عسى عيالك يسون لك مثل ما سويت لها جانك تعتبره بر ؟ لو سمحت ممكن نشوفها ؟

قال لي : افا عليك و لو بس اطفي السياره ياب المفتاح حتى يفتح القفل و الا قفله و را قفله يمكن اربع قفلات يالله فتح الباب عليها حشى اسد و الا فك مفترس مو امه ؟
دخلنا الغرفه غرفه الغساله و الخدامه و السايق احسن مليون الف مره منغرفتها مظلمه و ضيجه و بارده و حتى دريشه ما فيها هذي غرفه بالله ؟
المهم قال لنا : استريحوا على ما اناديها
قلت لامي و اختي وين نستريح من كبر الغرفه انا و امي داخلين و اختي بره من ضيج الغرفه ما ابالغ و الله هذي غرفه حاطها لامه ؟
يتلنا و الا آآآآآآآآخ لو تدرون كانت ما شاء الله عليها متينه الحين صارت عود جبريت كانت مستقيمه الحين منحنيه تمشي و تمسك بالكنفات جنها قاعد تركع ما جنها قاعد تمشي حيل ضعيفه شيء مو عادي و لا طبيعي ما جنها اهيه جنها وحده ثانيه كسرها حسبي الله عليه من ولد و الا اهيه ما كان فيها شيء ؟دخلنا عليها و بسنا راسها و الا تذكرنا و تعرفنا و تنادينا باسمائنا هذي كلش مو مخرفه و تسالنا عن جيرانها و تقول لنا : شدعوه ما تسالون علي و لا تقولون انسدحت على السرير و قال ولدها للخدامه يبي لامي كفر تتلحف فيه يوم اشوف الكفر اللي يقول عنه و الا خفيف الشرشف امتن منه و صغير عليها اهيه جافسه ريولها علشان تغطيها و ميته من البرد متقرفطه <<< هذا كفر بالله عليكم ؟

قلت له : ما تشوف امك شلون بردانه ييب لها كفر ثاني بس ها خله اضعف من جذي ؟ و قعدت عند ريلها طحت له بجي و دموع عمري ما سويتها بحياتي عاد انا الكل يقول دمعتي عزيزه و ما تنزل بسرعه لكن اللي شفتها كسر قلبي و خاطري عليها و قمت اقول بقلبي هذا يزاها اللي ربته و كبرته و علمته و سوته ريال ؟بس صج حسبي الله عليه ذبح كل شيء فيها ؟حتى عصايه تتكي عليها ماا حط لها ؟صج يزا الوالدين على الله ؟حتى عجفها الطوال قصوهم لها ؟شفت ملامح الزمن كله بويهها معنى انها ما كان فيها كل هالتجاعيد
بجيت انا و امي و اختي بجي عمري ما بجيت هالكثر ؟
طلعت و انا كلي حزن و قهر من اللي صار لها معقوله علشان زوجه الواحد جذي يسوي بامه و الله لو انها منو ما اسوي بامي جذي المره بدالها 1000 مو 10
حسبي الله عليه اهوه و مرته و عسى الله يهديه لامه
شصير لا حطالها غرفه ببيته و برها و طاعها ؟شصير لا خدمها و حطها بعينه ؟شصير لا خلاها الكل بالكل و كلمتاه ماشيه ؟اهيه الحمدلله تقولنا حتى معاش عندي مابي منه شيء بس يخليني عنده ؟
على فكره ترى رضا الله من رضا الوالدين فلما تبرهم و يرضون عنكما راح تخسر شيء بالعكس راح تاخذ الاجر و ربي راح يوفقك و الله عز وجل قرن عبادته بالاحسان للوالدين قال تعالى : و اعبدوا الله و لا تشركوا به شيئا و بالوالدين احسانا
شرايكم بهالسالفه ؟

و شرايكم بهالكلام ؟

و يا ترى هل اللي قاله عن امه يدش عقل واحد صاحي او عاجل ؟

و شسالفه هالخرف المبكر اللي وايد قاعد يبكر على الوالدين ؟
ابي تعليقاتكم و ارائكم بهالبوست ؟

و الله يعطيكم العافيه مقدما

و سلامز ياحلى عسلز :)