شنو يعني لا ... ما يعني شيء الا

شنو يعني لا ... ما يعني شيء الا

اول شيء

السلام عليكم ورحمه الله و بركاته

مبارك عليكم الشهر و كل عام و انتوا بالف خير ان شاء الله و صحه و عافيه

ثاني شيء

اعذروني تواجدي بالبلوق راح يكون شويه مو وايد كعادتي و السبب الوركس و الحين بعد شهر رمضان الفضيل فتواجدي صعب و اعذروني :) و ان شاء الله بعد رمضان راح يكون في مواضيع حلوه و مميزه و يديده باذن الله

ثالث شيء

اقروا هالبوست و شوفوا كلامي صح و الا غلط ؟
تعلمت في حياتي ان كل شيء يكون بالعكس مثل حال اليهال بالضبط لا قلت لهم لا تسوي هالشيء يعني سوا عندهم ؟

فاليوم حبيت اكتب لكم بطريقه عناد الاطفال و اكيد عكس عنادهم اهوه الصحيح بدون اي شك :)

العكس دايما صحيح شوفوا هالبوست و راح تفهمون قصدي عدل :)

شنو يعني لا صاعت البنت بالشوراع لي انصاف الليول <<< ما يعني شيء الاانها خوش بنت ؟
شنو يعني لا صار للبنت بوي فريند >>> ما يعني شيء الا ان سمعتها زينه ؟
شنو يعني لا شفت بنت تترنح و طالعه من شقه <<< ما يعني شيء الا انها كانت سهرانه مع رفيجاتها ؟ شنو يعني لا حبت البنت واحد و خلته و حبت ثاني <<< ما يعني شيء الا انها خوش بنت و مو لعوب ؟ شنو يعني الخبه اللي صارت بالمطار على احمد حسين و بشار و اللي طلع الاول بالوطن العربي بحفظ القران كويتي محد عبره ؟
شنو يعني لا يا الشتا البنت المتحجبه تلبس بوت و تنوره قصيره ؟
شنو يعني لا رحت لدكتوره كويتيه شايفه عمرها على بنات جنسها وودها تحذفهم باكبر ما عندها و احلى منها ماكو مع الشباب ؟
شنو يعني لا صورت البنت عمرها و اهيه متكشخه و حالتها حاله تقول مصوره عند بنت دشتي و لا ضاع موبايلها و الا باقوه تقوم الدنيا و تقعدها و تقعد تبجي ؟
شنو يعني لا قط الولد و الا البنت امه و الا ابوه بدار العجزه <<< ما يعني شيءالا انه حاشهم خرف مبكر << لهالدرجه الخرف المبكر حايش نص الامهات و الاباء ؟هالكثر هالمرض خطير و ينتقل و شائع و معروف عند الابناء بس ؟

شنو يعني لا ظلم القوي الضعيف و خسف فيه <<< ما يعني شيء الا ان الضعيف قادر ياخذ حقه من الظالم ؟ شنو يعني لا عرفنا ناكل و نهضم و غيرنا ما يعرف معنى الاكل و الهضم <<< ما يعني شيءالا انهم شبعانين و مالين من الاكل ؟

شنو يعني لا قدر القوي يرفع صوته و ياخذ حق مو حقه و الضعيف ما قدر <<< مايعني شيء الا ان الضعيف رايح صوته ؟ شنو يعني لا وصل المنافق اللي يعرف يجامل و يعاجف و غير المنافق ما قدر <<< مايعني شيء غير ان اللي ما نافق غير متحدث و دفش و مو لبق ؟

شنو يعني لا شافوا البنات بويه و قعدوا تحرشوا فيها <<< ما يعني شيء الا انهم ما يبون يكلمونها ؟ شنو يعني لا بجت قناه الجزيره على اللي صاير بالعراق و الطيارات الامريكيه تطير من عندهم <<< ما يعني شيء الا انهم ما يعرفون ينافقون ؟

شنو يعني لا لبست البنت عبايه الكتف لبستها ضيجه حدها و طلعت بنطلونها << مايعني شيء الا انها عاجله و ما تبي واحد يلحقها ؟
شنو يعني لا شافوا البنات واحد حلو يمشي مع مرته قعدوا يقارنون بينهم <<< ما يعنيشيء الا انهم مو محترين و طابخين ؟

شنو يعني لا طاحتله البنت مكالمات انصاف الليول و طار نص معاشها <<< ما يعني شيء الا انها قاعده تحل مشكله عويصه لرفيجتها و متعاطفه معاها ؟ << خنت حيلي ماتتعوص المشاكل الا انصاف الليول ؟

شنو يعني لا لطخت البنت ميك اب و صبغت عمرها صبغ و صارت من سمره حيل لي بيضه بياض ناصع <<< ما يعني شيء الا انها ما غشت الريال << و تلومون الرياييل لا طلقوا البنت من اول ليله ؟

شنو يعني لا سوت البنت سوالف الدنيا مع واحد و لا توهقت اقعدت تبجي و تدورالدكتوره فوزيه دريع تحل مشاكلها ؟ <<< ما يعني شيء الا انها قاعده ببيتهم عاجله و مسكينه و السالفه طاحت عليها طيح ؟
شنو يعني لا شافت البنت بالجامعه الطلبه الشباب المستجدين قعدت تمثل عليهم انها خوش بنت لا لحقها واحد من ربعها و الا كلمها صرخت عليه و تهاوشت معاه لهالدرجه السالفه مو مكشوفه و اهيه ما تعرفه كلش ؟و معقوله الشباب الكويتي لزقه بالبنات مني و الطريج ؟
شنو يعني لا رفعت البنت للشباب موبايلها و سوت فيه حركات <<< ما يعني شيء الا لا تشغل بلوتوثك و لا تكلمني ؟
شنو يعني لا تعرفت على وحده بالنت و قلتلها انتي من اي منطقه طلعت احسن منطقه بالكويت و قالتلك انها ساكنه هناك و بعد فتره لا نست و سالتها مره ثانيه قالت لك منطقه ثانيه <<< معقوله كل بنات الكويت ساكنين بنفس المنطقه ؟
شنو يعني لا انخطبوا البنات لواحد 4 او 5 سنوات ما تزوجوا بس خطوبه لظروف دراسه و ظلوا يطلعون و يدخلون و يروحون و يردون معاه و لا خلص دراسته و صارت الصجيه قاموا يلفون و يدورون و يطلعون عيوب الدنيا فيه <<< معقوله هالاربع او الخمس سنوات ماتعرفوا عليه عدل .. شهالعياره <<< ما يعني شيء الا انهم ما يلعبون و جادين حدهم ؟
شنو يعني لا رفضت تكلم وحده بالجامعه لانك ما تواطن البنات و سوالفهم و مالك خلقها و حدها بايخه و فجاه تلقاها واقفه عند باب بيتكم<<< ما يعني شيء الا انها تبيك تشرحلها مساله و ما تبي تكلمك ؟ >>> ليش شقالولها دكتور بالجامعه ؟
شنو يعني لا قعدت بكافتيريا الجامعه و جابلتك وحده شبعتك خز و لا خزيتها قامت من مكانها و قعدت يمك و سالتك بكل وقاحه مشبه علي ؟ <<< ما يعني شيءالا انها كلش محترمه و ما تتحرش و ما تبي احد يكلمها و مو وقاحه منها باختصار حدها محترمه عمرها ؟

شنو يعني لا رفصت تسمع كلام وحده او تكلمها و سوت سوالف و خذت رقمك و قعدت تضايقك الا ترد عليها <<< ما يعني شيء الا انه البنات كلش ما يتحرشون ؟
شنو يعني لا اول ما كبرت تكبر على امك و ابوك <<< ما يعني شيءالا انك كلش مو سافل و لا عاق ؟ شنو يعني لا نجحت في حياتك و هاجمك كل الناس لنجاحك <<< ما يعني شيء الا انهم مو حاقدين عليك و حدهم فرحانين لنجاحك ؟

شنو يعني لا قطيت امك و ابوك بدار صغيره بالحوش تقول غرفه خدامه و الا سايق حتى الخدامه و السايق ما قاموا يسكنون باي مكان مظلمه و حدها صغيره معنى ان البيت اكبر منه ماكو و تقدر تحط بدال الغرفه لهم 10<<< ما يعني شيء الا انه بر زايد للوالدين و مو سفاله منك و مو سكانه مرته كلش ؟ شنو يعني لا فتحت مسنجرك و لقيت وحده ضايفتك و لا قلتلها منو حضرتج طاحتله مغازل فيك انت تنحرج من كلامها اللي ما ادري شلون صايرو اهيه ويهها مغسول بماي البحر <<< ما يعني شيء الا ان كل شيء عادي و طبيعي ؟

شنو يعني لا رحت مكان عام و لقيت بنت ماسكه اييد شاب تقول خطيبها و لما تمر صوبهم يطلع اشكره الاخ صاحبها <<< ما يعني شيء الا انه صاحبها الروح بالروح خخخخ حلوه و الله يقولك اخوه في الله ؟

شنو يعني لا حبت البنت شاب مجرد حب بالعربي صحبه و صداقه <<< ما يعني شيء الا ان العلاقه اللي بينهم اخوه في الله ؟ <<< جايز و يصير ؟ <<<

شنو يعني لا لقيت الزقاره ما تطيح من اييد البنت <<< ما يعني شيء الا ان نفسيتها تعبانه و الطبيب النفسي نصحها لا ضاق خلقها تدخن ؟ <<< خنت حيلي و الله ؟

شنو يعني لا فرقتنا الدنيا علشان الفلوس و العيال و الزوجه <<< ما يعني شيءالا ان الفلوس وصخ دنيا و العيال مولودين و الزوجه بدالها عشر ؟ <<< خوش كلام
شنو يعني لا صار الريال سكانه مرته و مشته على هواها و على كيف كيفها <<< مايعني شيء الا انه شخصيته قويه و يسمع كلامها لانه يحترمها و كلش مو خايف منها و متصروع حده ؟

شنو يعني لا البسوا الشباب و البنات نظارات شمسيه باماكن مصكره و مكيفه و ما فيها شمس <<< ما يعني شيء الا انهم ما يبون يخزخزون خلق الله على راحتهم ؟
شنو يعني لا نسى الابن ابوه و لا ظلم الاخوا اخوه <<< ما يعني شيء الا ان مو على الدنيا السلام ؟
شنو يعني لا شفت الخطا بعينك و سكت <<< ما يعني شيء الا انك خوش واحدو ما ترضى بالغلط ؟

شنو يعني لا كنت بالسوق و فجاه شفت وحده تمشي جنها تركض و لا شافت حرمه محترمه وقفت وراها يعني انا يايه و ياها <<< ما يعني شيء الا انها ما سوت سواتالدنيا و مو خايفه من واحد تحرشت فيه و لا وقفت ورا الحرمه علشان شيء بس لانها خايفه بالسوق بروحها و تنطر امها تسفط سيارتها وتيي <<< يمه يالعياره ؟
شنو يعني لا شفت بنت الله لا يروايك شنو لابسه و لا شنو حاطه و تتحرش بالشباب و ما بقى حركه و كلمه ما سوتها او قالتها و الام يمها و كل شيء عادي و طبيعي عند امها <<< ما يعني شيء الا ان كانرب البيت للدف ضارب فشيمه اهل البيت الرقص ؟ <<< يا عيني و الله على البيت ؟

شنو يعني لا ... ما يعني شيء الا

لي متى كل شيء شنو يعني و كل شيء عادي عندنا مع كبره و عظمه عند ربنا و عند غيرنا؟

لي متى نسوي سوات الدنيا و جنه ما سوينا شيء ؟

لي متى نستهين باخطاءنا و ذنوبنا على حساب الغير و مع هذا احنا اللي ندفع الثمن ؟

شنو يعني لا ما رديتوا او علقتوا >>> ما يعني شيء الا اني ماني زعلان و لا متضايق و لا باذبحكم خخخخخ :)

ما ادري شرايكم بهالبوست ابي ارائكم و تعليقاتكم العسلز يا عسلز :)

و السموحه يالغاليين

the flowers of life

المراه و الرجل

the flowers of life

المراه و الرجل جزءان لا يتجزا من بعض هما البعض
لهذا السبب خصصت مساحه بسيطه من بلوقي للمراه و الرجل حتى يعرف كل منا قيمه الاخر

ما عليكم سوى المتابعه وابداء تعليقاتكم و ارائكم :)

المرأة هي أسرة ووطن.. الرجل الأمان والقوة ...
المرأة رقيقة وهي أنثى .. الرجل عظيم وهو رجل ...
المرأة حينما تخرج للعمل فهي تؤدي رسالة علمية ولكن عوز أسرتها لها أعظم .. الرجل يحتاجه العمل ليسعد بتقديم متطلبات أسرته ويحمي أبناؤه وأسرته من عوز الآخرين...
المرأة دفئا ً وحنانا ً وسكن .. الرجل أمانا ً وقوة وعطف ...
المرأة وزارة الداخلية لا يستتب الأمن في المنزل إلا وهي علي رأس العمل .. الرجل وزارة الخارجية ليحمي ذلك الكيان الشامخ من الخارج ...
المرأة حينما تحمل وليدها وتسهر عليه تقوى على ذلك .. الرجل حينما يسهر على زرع الفرح والسرور في قلوب أبنائه يقوى على ذلك ...
المرأة صبر يمازجه عطاء بلا توقف .. الرجل حدة يمازجها قوة وعطف بلا توقف ...
المرأة ليست جميلة وهي تؤدي دور الرجل..الرجل لا يبدو وسيماً وهو يؤدي دور المرأة ...
المرأة دمعة .. الرجل أرق من تلك الدمعة ولكن خلف أسوار وقلاع وحصون...
المرأة سر سعادة المنزل.. الرجل سر سعادة الكون...
المرأة تصون عندما لا تخون.. الرجل يخون عندما لا يجد من يصون...
المرأة عندما تطهو طعامها تقدمه لأسرتها على أطباق من سعادتها الغامرة ..الرجل عندما يتذوق طعامها لا يجد لطعمه مثيل وحتى لو كان قليل...
المرأة العطر الزكي .. والكلمة الشجية .. الرجل الأنف الذي يشم ذلك المسك .. والأذن التي تعي ما تسمع ...
المرأة تتحدث ليسمعها الرجل.. الرجل ينصت ليسمع ما تقوله المرأة ...
المرأة ابتسامة .. الرجل الفنان الذي يرسم تلك الابتسامة...
المرأة اليد اليمنى للرجل.. الرجل أصابع تلك اليد اليمنى ...
المرأة أقوى من الرجل بعذوبة أنوثتها.. الرجل أقوى من المرأة بعنفوان رجولته.
المراه قيثاره تبوح لمن يجيد العزف عليها

أجمل ما قيل في الرجل

الرجل الساذج يطلب من المرأة أن تحبه ,,, و الرجل المجرب يجعلها تحبه
الرجل هو المادة الخام التي تعمل فيها المرأة اللمسات الأخيرة
الرجال يقولون في النساء ما يروقهم , و النساء يفعلن بالرجال ما يروقهن
الرجال يحبون بسرعة , لكنهم يكرهون ببطء
إذا رأيت الرجل لجوجا , مماريا , معجبا بنفسه فقد تمت خسارته
الرجال ثلاثة أنواع : رجل يدَعي أنه على حق و هو العنيد , و رجل يعترف أنه على خطأ و هو العاقل , و رجل يؤكد أنه على خطأ حين يكون على صواب و هذا هو المتزوج
الرجل المصاب بداء الحب يتحول من صياد إلى طريدة
شيئان يحبهما الرجل : الخطر و اللهو , و هو يحب المرأة لأنها أخطر أنواع اللهو
الرجل حبل مشدود فوق هوة بين الحيوان و السوبرمان
لكل رجل امرأة أحلام بعيدة المنال , تكون أحيانا موجودة على الأرض , و تكون غالبا في ضمير المجهول
حين يرتكب الرجل بلاهة ما يقولون : ما أشد بلاهته . و حين ترتكب المرأة بلاهة ما يقولون : ما أشد بلاهة النساء !!!!
يفقد الرجل أوهامه أولا , ثم أسنانه , و أخيرا طيشه
خاطب في الرجل عقلة , و في المرأة قلبها , و في الأحمق أذنه
الرجال أطفال كبار
الرجال يمكنهم أن يقاوموا نظرية صائبة و يستسلمون لنظرة
الرجال يحلمون قبل الزواج , و يستيقظون بعده
يستدل على الرجل بأعماله , و على أصلة بعقله
قوة الرجل بدماغه و قوة المرأة بدموعها

أغرب ما قيل في المراه

سئل أحد الفلاسفة: كيف تختار امرأتك فأجاب: لا أريدها جميلة، فيطمع فيها غيري.. ولا قبيحة، فتشمئز منها نفسي.. ولا طويلة، فأرفع لها هامتي.. ولا قصيرة، فأطأطئ لها رأسي.. ولا سمينة، فتسد علي منافذ النسيم.. ولا هزيلة، فأحسبها خيالي.. ولا بيضاء مثل الشمع.. ولا سوداء مثل الشبح.. ولا جاهلة فلا تفهمني.. ولا متعلمة فتجادلني.. ولا غنية فتقول هذا مالي.. ولا فقيرة فيشقى من بعدها ولدي.
شاهد فيلسوف امرأة شنقت نفسها في شجرة فقال: يا ليت كل الأشجار تحمل مثل هذه الثمار.

صفات المرأة بالعمر

قال بعض القدماء المحدثين: بنت عشر سنوات... لوزة مقشرة للناظرين.. بنت خمس عشرة... لعبة اللاعبين.. بنت عشــــــــرين... ذات شحم ولحم ولين.. بنت ثلاثيــــــــــن... ذات بنات وبنين.. بنت أربعـــــــــين... عجوز في الغابرين..

اتمنى انكم استمتعوا بالهالبوست و كل منا عرف قيمه الاخر :)

الابتسامه

الابتسامه

اجمل ما يزين وجه الانسان الابتسامه :)

هي كالسحرتبث الأمل في النفس و تزيل الوحشة من جوفها000ترسم السعادة من جديد و تحيي روح القلب إنها (( الإبتـسامة )) فلما لا نرسمها دوما على شفاهنا لنجتاز ما يعيقنا و يعثر طريقنا

متى ابتسم ؟

ان ضاقت علي الحياه .. ابتسم

ان رايت موقفا مضحكا .. ابتسم

ان ابتلاني ربي .. ابتسم

ان جاملني الاخرون .. ابتسم

ان اراد احد تصويري .. ابتسم

ان رايت النفاق يعم حولي .. ابتسم

ان لقيت تشجيعا و احتراما من الاخرين .. ابتسم

ان وجدت نفسي فردا فعالا و منتجا .. ابتسم

ابتسم فتورق أغصان قلبي وتزهر شراييني وتسيل جداول دمي و تحلو الحياه امامي

ودعوه مني لكم للتبسم :)

لا تياس اذا تعثرت اقدامك و سقطت بحفره واسعه .. فسوف تخرج منها و انت اكثر تماسكا و قوه و الله مع الصابرين

لا تحزن اذا جاءك سهم قاتل من اقرب الناس الى قلبك .. فسوف ياتي من ينزع السهم لك و يعيد الحياه الى قلبك

لا تضع احلامك كلها في شخص واحد و لا تجعل رحله عمرك وجه شخص تحبه .. مهما كانت صفاته

لا تعتقد ان نهايه الاشياء هي نهايه العالم .. فليس الكون هو ما ترى عيناك

لا تنتظر حبيبا باعك .. و لكن انتظر حب جديد يمكن ان يتسلل الى قلبك الحزين مع اشراقه كل صباح

لا تكن مثل مالك الحزين ذلك الطائر العجيب الذي يعزف اجمل الحانه و هو ينزف فلا شيء يستحق من دمك قطره واحده

ابتسم فالابتسامه اقل تكلفه من الكهرباء ولكنها اكثر نوراً

ما اجمل ان يبتسم الانسان و الحزن في قلبه تعبر عن اعظم الم في داخلنا لكن ما اجملها ان خرجت مع كل هذا ؟

ما اجمل ان يبتسم الانسان و في عينيه الف دمعه ؟ و ما اجملها و اروعها من ابتسامه خرجت من قلب حزين

قيل عن الابتسامه :) ؟

الابتسامة تذيب الجليد 0000وتنشر الارتياح 0000 وتبلسم الجراح : انها مفتاح العلاقات الانسانيه الصافية0000(فولتير)

جميل ان تبدا الصداقة بابتسامه 0000 والاجمل ان تنتهي بابتسامه0000( اوسكار وايلد )

الابتسامه طريقك الاقصر الى قلوب الاخرين 0000( حكمة تايلنديه )

ان تشق طريقا بالابتسامه خير من ان تشقه بالسيف0000( شكسبير)

ابتسامة المرأه شعاع تفوق سرعته سرعة الضوء ( كارل ساندبرغ )

الحب دمعة وابتسامه0000دمعة من سماء التفكير ، وابتسامة من حق النفس ( هيجو)

ليكن وجهك باسما وكلامك لينا ، تكن أحب إلى الناس ممن يعطيهم الذهب 0000

( لابرويبر )

تجارب العلماء

تجارب كثيرة أجريت حديثاً لفهم تأثير الابتسامة على الاستقرار النفسي للإنسان، وقد تبين لهؤلاء العلماء أن وجه الإنسان يحتوي بحدود 80 عضلة، وعندما يغضب وترتسم علامات الانفعال على وجهه فإن معظم عضلات الوجه تشارك في هذا الانفعال.ولكن الشيء اللافت للانتباه أن الابتسامة لا تكلف عضلات الوجه أي طاقة تُذكر، لأن عدداً قليلاً من العضلات يشارك فيها! ومن هنا استنتج علماء النفس أن تكرار الابتسامة يريح الإنسان ويجعله أكثر استقراراً، بل إنهم وجدوا أن هذه الابتسامة تقلل من حالة الاكتئاب التي يمر بها الإنسان أحياناً.
فالذي يبتسم لمن حوله يمنحهم شعوراً بالاطمئنان، ويزيل الحواجز بينه وبينهم، وبعبارة أخرى تكرار الابتسامة يكسب الآخرين الثقة بهذا الشخص المبتسم

و قد قال رسول الله صلى الله عليه وسلم : تبسمك في وجه اخيك صدقه

فلما لا نبتسم ونبينا و حبيبنا دعانا للابتسامه و هي في نفس الوقت صدقه ؟

اذا وداعا للتكشيره و بسنا حزن و خلونا نبتسم :)

سبحانك ربي ما أعظم شأنك ؟

سبحانك ربي ما أعظم شأنك ؟

سبحان الله خلقنا باحسن صوره و اعطانا من النعم ما لا تعد و لا تحصى و مع هذا نقابل احسانه و عظيم صنعه بالمعصيه فنعصيه في الخلوات و نستحي من الناس و لا نستحي منه و لا نعبده حق عبادته ولا نشكره او نحمده على نعمه التي انعم بها علينا
و مع هذا ان اخطانا او اذنبنا غفر لنا سبحانه ما احلمه و ما اعظمه و ان دعيناه في رخاء او شده اجبنا ؟
سبحانك ربي ما اعظمك و ما احلمك على عبادك
فعندي لكم حديث قدسي راائع جدا
تتجلى عظمة الخالق ... في الحديث القدسي الشريف
قال سبحانه وتعالى :
(( يا ابن آدم جعلتك في بطن أمك .. و غشيت وجهك بغشاء لئلا تنفر من الرحم ...
و جعلت وجهك إلى ظهر أمك لئلا تؤذيك رائحة
الطعام .. و جعلت لك متكأ عن يمينك و متكأ عن شمالك ..
فأما الذي عن يمينك فالكبد .. و أما الذي عن شمالك فالطحال ..
و علمتك القيام و القعود في بطن أمك .. فهل يقدر على ذلك غيري ؟؟
فلما أن تمّت مدتك .. و أوحيت إلى الملك بالأرحام أن يخرجك ..
فأخرجك على ريشة من جناحه .. لا لك سن تقطع .. و لا يد تبطش .. و لا قدم تسعى ..
فأنبعث لك عرقين رقيقين في صدر أمك
يجريان لبنا خالصا .. حار في الشتاء و باردا في الصيف ..
و ألقيت محبتك في قلب أبويك .. فلا يشبعان حتى تشبع .. و لا يرقدان
حتى ترقد .. فلما قوي ظهرك و أشتد أزرك .. بارزتني بالمعاصي في خلواتك ..
و لم تستحي مني .. و مع هذا إن دعوتني أجبتك ..
و إن سألتني أعطيتك .. و إن تبت إليّ قبلتك ))

سبحان الله و بحمده سبحان الله العظيم
سبحان الله عدد خلقه و زنه عرشه و مداد كلماته :)
سبحان الله بمجرد ما يقرا الانسان الحديث القدسي يشعر بالعار من افعاله مع خالقه و ربه و الخزي من عظمه اساءته لرب العباد ؟

يقول ابليس : عجبا ! لبني ادم يكرهونني و يطيعونني و يحبون الله و يعصونه ؟

جميل هذا الوقت محبط ....؟

جميل هذا الوقت محبط ....؟
ارفع حجر تلغى مغني اكتب سطر تصير شاعراكسب صحافه تصير سيد الثقافه
جميل هذا الوقـــت ..... محبط
اكتب بما يرضي ضميرك تصير حاقد اشتم بحده تصير ناقد نافق بشده يصير مستقبلك واعد اسرق رغيفين تصير المجرم السارق اسرق ملايين تصير الماجد الحاذق
جميل هذا الوقـــت ..... محبط
اشرب على العشا كاسة نبيذ و اسمع لشوبان و ارقص الفانس تصير متحضر
اطلق اللحيه ورتل القرآن و صل الخمس تصير ارهابي
جميل هذا الوقـــت ..... محبط
اجرح يهودي تقوم هالدنيا و تقعد اهتك اعراض ثكل يتامى شيل بيت امح مسجد تنوم هالدنيا و تسكت
جميل هذا الوقـــت ..... محبط
عيش هالعمر الوسيع و بعد ما تحياه موت عيشوا هالعمر الوسيع و موتوا موتوا جميع هذا الوعد يوم الوعيد يوم تنسى الام الطفل الرضيع
عظيم ذاك الوقت منصف

الامير عبد الرحمن بن مساعد

سوق شرق

هالسووق فيه سوالف عجيبه غريبه و كلش مو طبيعيه
يقولون مال عقد ؟ و اهوه العكس ؟
نص بنات و شباب الكويت صايعين فيه بس من تحت لي تحت
كنت رايح ويا الوالده و اختي يبون أغراض من دبنهامز و كليرز و البودي شوب
عاد قلت خل اوديهم شرق كل هالشغلات فيه بعد ليش دربين
أول ما دخلت شفت بنت مو حضريه شكلها من العقد لابسه بدي وردي و جينز حده ضيج و كعب نعال عزكم الله وردي و كاب و نظاره بصرااحه مبين عليها عقيديه و الليمعاها اعقد منها يوم دخلت البنت شرق فصخت عبايتها و لفتها و قامت تتمشى مع الاخ العقيدي ؟لا و تضحك بعد و منزله راسها و مسويه روحها كلش على شنوو ما ادري يا ليت حلوه على كل هذا خخخخ
و كملنا شوي و الا بنت لفه و مطلعه نص رقبتها بعد ليش متحجبه ما ادري خخخخ و بنطلون جينز و حزام و حالتها حاله و ماسكه واحد من ايده و تتمشى وياه و تتضحك و الله حسبت خطيبته يوم مرينا يمهم و الا اسمعها تقوله : انت وين سافط سيارتك ؟؟ اشكره
ما ادري الاهل يدرون و الا ما يدرون ؟ ووينهم ؟ ليش ساكتين ؟
ودي القى احد يجاوب لي على هالاسئله اللي ماني لا قيلها اجابه و كلي اسف و الله
و الله هالبنات ما يستحون على ويهم ما ادري شنو من بنت اللي ترضى على نفسها تطلع مع واحد و تجازف بعمرها و تخون ثقه اهلها علشان واحد ما تعرفه ؟ و ياليت تعرفه و الا اهوه يموت فيها ؟ عفيه بنت ما تخاف على نفسها ؟
مو بس هذيله ترى الف بنت و بنت بشرق يتمشون مع شباب ما يعرفوونهم لا من قريب و لا من بعيد ؟
للاسف و الله وين الاهل ؟ و ين الام ؟ و ين الاب ؟ وين الاخ ؟
بس صج لا حياه لمن تنادي
الابوا هاد بنته و مخليها على كيف كيفها و الولد صاكين عليه يقولك خايف ينحرف ؟؟
يتروالي لو يهد الولد و يصك على البنت وايد احسن ؟ على الاقل الولد يشيل عيبه بس البنت شنو حالها ؟
انا ما اقوول صكوا عليهم و لا تطلعونهم بالعكس و الله بس كل شيء بحدود
ترى الكشخه مو جذي
كل بنت تبي تكشخ يعني امسكتلها واحد و تمشت وياه شنو البوي فريند جزء من الموضه و الكشخه ؟؟ << غريبه هالدنيا و الله ؟ بس صج و الله سوق شرق صاير ملتقى العشاق و الأحبه ؟ شالسالفه ؟ الاهل ووينهم ؟
ادري الحين الكل بيقول اني متشدد و دين لا بالعكس انا عادي جداً
لكن في المعقول و الغير معقول و كل شيء قاعد يسوونه البنات و الشباب بهالزمن كلش غير معقول و فوق المعقول بعد ؟
يعني المفروض البنت تخاف على نفسها و تتحسب كل خطوه قبل لا تخطيها و كل كلمه قبل لا تقولها و تحافظ على نفسها كثر ما تقدر لانها بنت و لان الثقه تنعطى مره وحده و المفروض تحافظ على هالثقه الغاليه الليعطوها اهلها كثر و قد ما تقدر لان لولا سمح الله خانت هالثقه عمرها ما راح تقدر ترجعها لو تموت ؟و كافي انه صورتها راح تنهتز
بصراحه
لو البنت ما حافظت على نفسها ؟ منو بيحافظ عليها ؟

اشمعنا المارينا ؟

هلا و الله بالعسلز و العسلزاتز الزوار و الاصدقاء الكرام :)

عندي اليوم تساؤل من تساؤلاتي المعتداه و اللي كالعاده مو لاقيلها جواب و ابي جوابكم عليها :)

اشمعنا المارينا ؟
اشمعنا المارينا من بين كل هالاماكن اللي نلاقي القز فيها منتشر انتشار فظيع
عسى ما سالت واحد وين رايح قال المارينا ؟
عسى ما قالي واحد شرايك نطلع اقوله وين يقول المارينا ؟
عسى ما قلت لواحد من وين ياي قال المارينا ؟
عسى ما ضاق خلقنا شفنا روحنا already جدام المارينا ؟
و نص الاهل نلقاهم هناك ليش ما ادري ؟
خالتي تقولنا رحت المارينا شفت بنت خالتي ؟ و انا شفت خالي و مرته و عيالهم ؟و مرت خالي و بناتها ؟ و بنت خالي شايفه ولد خالي هناك خخخ ؟
يقولون اللي عنده واحد من الاهل ضاايع يلقاه هناك ؟ <<< ما ادري صج ؟
اشمعنا المارينا اللي من بين كل الاماكن الحلوه بالكويت كل العالم فيها ؟
معنى ان المارينا فيها مثل كل المجمعات تزيد عنهم بشوي شغلات مو وايد يعني
يعني هالمارينا صارت حديث الساعه خخخخ
يقوولك في ايام للكشخه بالمارينا و ايام للعقد <<< شلون >>> اقولكم شلون
يقولك اظن اذا ماني غلطان
الاحد و الثلاثاء أو الاثنين و الاربعا للناس الكشخه و باجي الايام ما تلقى الا العقد ؟
صج في جذي انا ما لاحظت هالشغله لان روحاتي للمارينا مو ووايد ؟ :)

ما ادري انتوا ملاحظين ان الكل صار في المارينا و الا شرايكم يا عسلز :) ؟

البويات ؟

البويات جنون مو طبيعي و موضه هالعصر
يعني لازم كل مكان تروحله تلقى في بويه ما قط رحت مكان مالقيتهم
و بالمسيله منتشرين انتشار مو طبيعي
كل بويه ما خذتلها وحده تتمشى معاها
على شاطىء المسيله بنت وياها بويه يلعبون طائره ؟
و اللي مسويه روحها اخصائيه نفسيه منزله راسها و البنت تشكيلها همومها ؟ << حركات و اللي تشيل اغراض رفيجتها ؟ و اللي تشيش و ما خذه راحتها على الاخير واللي معاها تهف عليها ؟ << خوش شيء لا والاالبنات العيايره لي شافوا بويات قعدوا يتحرشون فيهم << يمه منكم صج عيايره اي خلوهم واللي يضحك و يموت من الضحك ان البويات طايحيله حديد في نادي الهلال الاحمر<< الظاهر يتزهبون حق العرض بالمسيله سمعوا هالسالفه
في يوم كانوا توهم مفتتحين البحر سنتر قلت خلني اروح اشووف شنو فيه شنو مافيه
المهم و انا قاعد اتمشى القى بويه معاها وحده قاعده تنقيلها تي شيرتات و برمودات و بنطلونات البويه مسويه روحها كلش ما في شيء عاجبهاو البنت وعليه عليها ذابحه روحها تدور لها خخخخخ
و بنت عمي تقولي قايلتلها رفيجتها بالمدرسه انها رايحه المدينه الترفيهيه و شايفه بويتين الاولى قاعد تترقص و البويه الثانيه ما تعرفها قاعده تصورها بموبايلها عاد يوم شافتها البويه الاولى قاعده تصورها البويه الثانيه طاحوله طق مطاقق يعني هووشه خخخخخ عاد عقب ما خلصت الهووشه و تعبت الاولى من الطق راحتله نفخ زقاير تبرد على قلبها خخخخخ
لا و بنت عمتي الثانيه تقول رحنا المدينه الترفيهيه يوم الاثنين طبعا للي ما يعرف يوم الاثنين للنساء بس :) تقول و شفنا موضه يديده هابين فيها البويات طايحيله ترقم بالبنات خخخخخخ تقول احنا نفتك من الشباب ييولنا البنات ؟ ياخي و الله غريبه ؟
و الله محد مسوي العجز بالسوق من برمودات و عطورات و جينزات الا هالبويات اللي ما ادري من وين طلعوا لنا ؟
ما ادري الواحد يضحك عليهم و الا يبجي عليهم ؟
يعني هالبويه اللي اهيه بنت بااجر بتندم اكبر ندم بحياتها
البنت اللي كانت معاها تتزوج و تروح و تهدها لا و تنساها بعد و البويه ..... ؟؟
بعرف شنو فايده كونها بويه ؟
هل تعويض نقص ؟ او شنو بالضبط ما ادري
انا يتروالي تكشخ بالبويه خخخخخ يعني معاي شبه ريال خخخخخ على الاقل لو تمشي مع ريال احسن واايد على الاقل تستحي و تخاف منه و تحترم عمرها و في حدود و خطوط حمره ما تقدر تتخطاها ؟
ما أدري شنو رايكم

آنا عن نفسي لا تعليق :(

سالفتي مع طبيب الاذن

في يوم كنت قاعد اشتغل على الابتوب فجاه و بدون مقدمات ما كان فيني شيءحسيت الدنيا دايره فيني دخت المهم خليت

الابتوب شغال و نمت على السرير ما ني قادر أتحرك احس الدنيا دايره فيني المهم بعد ما قعدت و الا اتفاجىء اني مصخن حدي نارو المشكله لا نشله يعني انفلونزا و لا بلاعيمي تعورني المهم ليت لي جم حبه ادول و الوالده تقولي خلني اوديك الطبيب قلت لها ليش خو ما فيني شيء الا صخونه المهم نمت و قعدت ثاني يوم جني حصان قعدت الظهر علشان بصلي فجاه حسيت اني ما قمت اسمع من اذوني اليسارحتى اوضحلكم لما اتكلم اسمع صدى صوتي طنين يعني باذوني اليسار نظفتها ماكو لما الحين الطنين موجود المهم رحت المستوصف و الا دكتوره شكلها عليميه قاعد تطالع اذووني تطالع و تطالع و انا اقول لروحي هالكثر الشغله خطييره :( ضاق خلقي والله بعد هذي اذوني <<< لا عبالي اذون الجيران خخخخ المهم جان تقولي عندك خرم بالطبله انا انصدمت شويه و قلبي وقف تخيلت اني ما اسمع و اكون اصمخ صعب علي و الله المهم قالت لي خلني اشوف مره ثانيه عاد قالتلي لا لا خرم بالطبله مسويه روحها كلش فاهمه الدنيا عدل قالت لي تاكد من اخصائي الاذون و حولتني لمستشفى تعبان حده يتروالي كلكم تعرفونه ؟ المهم قالت لي جيك مو متاكده بعد هذي اذوونك روح اتطمن :(و بعدين لصار عندك وقت تعال قولي شنو قالك الدكتور قلت ان شاء الله قالت لي لا تقول للدكتور اسمع صدى صوتي قلت ها عيل قالت لي قوله طنين قلت اووكي مشكوره دكتوره الله يعطيج العافيه و طلعت و بصراحه بيني و بينكم طقني الحزن :(المهم رحت للدكتور و انطر دور قبلي واحد بس طبعا الدكتور مصري المهم يوم دخلت طل طله وحده على اذوني ما مداه من زود الشطاره قال يشوف انت عندك لخبطه بالدوره الدمويه مأثره على العصب اللي بالاذن مسببه لك ضعف شديد قداً قداً قداً بالسمع <<< مصري المهم كتبلي اروح السبت للتخطيط بالعيادات الخارجيه لان اليوم كان الاربعا و طاف
طبعا تخطيط للاذن فيوم قعد ابوي كان نايم قيلوله امي قالتله الوالد انصدم و كان بعد جم يوم بيروح لندن قال اذا هذا اخلي اخته و اخذه المهم الوالد بعد الصلاه طار فيني على دكتور يعرفه شاطر المهم قالي عندك انسداد بالقناه السمعيه ما عجبني كلاامه ليش انه كل واحد يقول كلام فحدي متنرفز و متضايق شنو هذاما في دكتوور سنع عندنا بالكوويت ؟المهم فكتبلي وصفه قطره بالانف شكوا ما ادري و جم كبسووله و هالسوالف المهم بعد جم يوم واظبت على الدوا فجاه انفتحت اذوني الحمدلله و سمعت عدل و كانت فرحتي بالدنيا كلهابس بصرااحه شهالدكاتره اللي يوصفون للعالم غلط دوا غلطو وصفه غلط عيل شبقى خلهم يقعدون ببيوتهم احسن ؟؟و الله قهر دكتور صارله جم سنه دارس يتفلسف على العالم دارس بلندن و ما جستير و دكتوراه و ما يفهم و لا شيء انا افهم اكثر منه :(بما انه دكتوراه و ما جستير وين شطارته و الا بس شاطر فلسفه على خلق الله ؟

ما ادري انتوا شرايكم بدكاترتنا ؟

ليست مشكلتي

ليست مشكلتي ان لم يفهم البعض ما اعنيه ؟
و ليست مشكلتي ان لم تصل الفكره لاصحابها ؟
فهذه قناعاتي و هذه افكاري
اكتب ما اشعر به .. و اقول ما انا مؤمن به
و ليس بالضروره ما اقوله يعكس حياتي الشخصيه ؟
هي في النهايه مجرد رؤيه لافكاري
مع كامل ووافر الحب و التقدير.. لمن يمتلك وعياً كافياً ..

.. يجبر قلبي على ان يحترمه

ليش ؟

ليش لي طلعوا ربع المعرس من الصاله تحلى روحت البنات حق الحمامات
ليش صارت حفلات الاستقبال عندنا على اي شي مو باقى الا يسوون حق العزا بعد
ليش لما نقعد بالحمام حشاكم نعد البورسلان اللي بالطوفه....ماكو شغل صح
ليش البنت لي شافت واحد حلو تخفف عشان تبي تشوف لوحة سيارته العاصمه ولا الجهرا
ليش لي صرت منتف وماكو بيزات تخترب السياره خراب جايد
ليش البنات اللي يسوقون رينج وديسكفري يلبسون ساعات كبيره ويحطون ايدهم على الجام
ليش ضباط العاصمه اللي توهم متخرجين يسوون تفتيش على شارع الحب...لهدرجه فيه مجرمين
ليش ماينقلون شويخ الصناعيه والجيون مكان ثاني ويسوون مكانها مناطق سكنيه
ليش هالخبه اللي صارت حق بشار بالمطار واللي طلع الاول في الوطن العربي بحفظ القرآن كويتي محد عبره
ليش هابين يدزون فايروسات من ايميلات غريبه واحنا ما نعرفهم ولا يعرفونا
ليش اغلب اللي يطلعون من الصالحيه مو شارين شي....معقوله موعاجبهم شي هناك
ليش امريكا ماترجع قواتها لي حدود الكويت وتخلي العراق بكيفهم....خوش كلام والله
ليش المتحجبه لي يا الشتاء الا تبي تلبس بوت وتنوره قصيره غصب غصب كوووول
ليش البنات لي شافوا واحد ماشي مع زوجته قعدوا يقارنون بينهم....من طلب رايكم
ليش كل واحد شراله تيلفون بوكاميرا ويصور اي شي ويسويله ايميل مليق منه.....ماكو شغل صح
ليش مايصير العكس الشباب كروت ايزي والبنات فواتير عشان يحسون شوي ويجربون الرنه الوحده
ليش بعض الشباب ما يستحون على دمهم ويخزخزون المره اللي ماشيه مع ريلها...طرطور اللي معاها
ليش مافي شي اسمه صداقه بين بنت وولد كله يبون حب وخرابيط واخر شي فركش...منو يتعض
ليش الشباب يلحقون البنات لي بيوتهم واخر شي يتوكل على الله .....كفو ولد بلادي يخاف على بنتديرته
ليش اللي نحبه ما يبينه واللي مانحبه ميت علينا
ليش البنات ! ! اللي يركبون ورى الشباب بالسياكل لبسهم من خان الخليلي وزينه
ليش في بنتين هلاقه مرتزين في ممرات العلوم الاداريه واهما مو طالبات ومحد يعرفهم....يمكن نقص
ليش لما يصير في تنزيلات في فيلامودا البنات ما يتحجون ويروحون بسكات.....نحاسه والله
ليش الاصيلين يقولون ماناخذ بيسريه واخر شي ماخذله من بره الديره......لك تأبرني
ليش لما البنت تمسك مجله ليالينا تدور الحلوين وتقرا اساميهم
ليش الامهات بالعروس ماتخلي وحده ماتخطبها حق ولدها وولدها مايبي يتزوج....خنت حيلي
ليش طلبة الجامعه يفتشلون يقولون انهم ياخذون اعانه مع ان سموها مكافأة....صب وحقنه لبن
ليش امهات العبي هابين يطلعون البنطرون من فتحت العبايه يعني احنا خنت حيلي من الكـبْـت
ليش بالمسيله المتينه تكشخ بالبكيني والعصله والضعفيه تستحي....شنو هالثقه
ليش كل ماتروحين توب شوب تلاقين بويه معاها وحده يايه تشتري لها اغراض
ليش بعض الشباب يدشون المناطق الراقيه يعني ساكن هناك واخر شي كارف المطبه...اكيد ساكن بالجليب
ليش بعض البنات ! ! يحفظون اسامي ضباط الدوريات وزاماتهم بعد.....ابي اتزوج ضابط
ليش الجنوس يغارون من البنات ولي شافوهم بره يعطونهم نظرات خايسه....اي البنت شكو
ليش البنات يوم الملجه تدز اخوها عشان يشوف سياره المعرس...بالله متسلفها و ما تبين زواج
ليش البنت اذا واحد يا يشوفها تشوف حشاكم نعاله من الرتاج ولا النصر الرياضي...اعتقد مخه بنعاله
ليش الدكاتره الشباب اليدد اول سنه الكشره هالكبر وثاني سنه تخاف تسأله لايطقك بكبر ماعنده
ليش السنه لبس تخريج طلبة ضباط الشرطه جنهم اللي يصفطون السيارات بالشيراتون
ليش البنت لي شرت تيلفون بوكاميرا تصور عمرها تقول عارضت ازياء ولي انباق تصيح وتقول صووووووري فيه
ليش البنات ما يبقى بكيني ما يشترونه حق المسيله واخر شي حاطين لهم لوحه ممنوووووووع
ليش السمر الا تبي يصير لونها برونزي واهيا تعدت درجه البرونزي مايصير ياماما والله غصب اهوا
ليش البنات العيايره لي شافوا بويات قعدوا يتحرشون فيهم.....يمه منكم صج عيايره اي خلوهم
ليش البويات طايحيله حديد في نادي الهلال الاحمر....الظاهر يتزهبون حق العرض بالمسيله
ليش لما يدشون الريايل مع المعرس يحط الدي جي اغاني ترقص والبنات يموتون قهر
ليش الشباب يلبسون برموده وحشاكم نعال زنوبه حق الجامعه....داش حمام الحبيب
ليش قناة الجزيره تبكي على اللي حاصل بالعراق والطيارات الامريكيه تطير من عندهم...شهالنفاق
ليش لي صارت محاضرت البنت بكيفان لبست اي شي وبشويخ تكشخ على سنجت10
ليش اخر ورقه في كلينكس التعاون فيها خط احمر وكلينكس الجمعيات خط بنفسجي...سبحان الله معجزه
ليش مايسوون صاله خاصه حق المدخنين بالسينما عشان ياخذون راحتهم...اي كيفهم انشاءالله يموتون بس ما نبي زقاير
ليش البنت العصله اللي مهي قادره تمتن تقول انا جسمي جسم عارضات.....على خيرت الله
ليش لي صار وقت المسيله ماتلاقي بالسوق لا حنه ولا دم الغزال ولا جزر ولا شمندر....اموت عالخلطات

اللي يلقى جواب للاسئله يطلع عبقور زمانه ؟ :)

شكراً

شكراً يابو ناصر
بصراحه الف شكر للوالد القائد الشيخ صباح الاحمد الجابر الصباح على المنحه الاميريه
كثر الله خيره و قلل ويله :)
طبعا تصرف المنحه الاميريه 15 / 9 /2006
خلونا نشوف البنات و الشباب و العوايل شبيسوون بالمنحه الاميريه

بالنسبه للبنات
ركضه على السوق تشتري اغراض العيد ملابس العيد اكسسوارات عزكم الله جوتي و الا نعال على حسب الرغبه خخخخ
و اذا مو للعيد فواتير الموبايل او رصيد
جم علبه ميك اب خخخ حق سنه تكفيها خخخخ
جم بدله تنوره أو بنطلون للدوام و الا الجامعه

بالنسبه للشباب
يخيطون دشاديش
يشترون لهم جم تي شيرت و بنطلون
فواتير او رصيد موبايل
اقساط السياره
طلعات و عشيات و غديات و روحات و ييات و سينمات و صيعات خخخخ كل شيء شوي

بالنسبه للعوايل
يعدلون بيتهم من اثاث ، صبغ ، يبنون يعني
يدفعون فواتير الماي و الكهرباء
اقساط السياره
تصليح شغلات خربانه بالبيت ثلاجه ، غساله ، براده ، تكييف <<< حبكت وقت المنحه تخترب خخخ

بالنسبه لي

المعاش راح يكون طالع مع المنحه << منو قدي فما فكرت لي الحين شسوي فيهم ؟؟ فالوقت اللي يت المنحه فيه وقت رخاء و الحمدلله خخخخخخ

مسكينه هالمنحه و الله الكل ينطرها خخخخخ ما صارت و الله

و انتوا شنو راح تسوون فيهم ؟؟