اهيه .. اهوه .. #1

تنتظره في غرفة الجلوس

تشاهد التلفاز

تقلّب صفحات المجلات بتملّل

تغفو قليلاً ثم تصحو

الساعة السادسة صباحاً

يفتح الباب

يترنّح

تارة يميناً و تارة شمالاً

تفوح منه رائحة الخمر

تنظر إليه متقزّزة من منظره

و حالته التي يرثى لها

يحدّثها بلسان ثقيل

اهوه : أوووه الأبلة قاعدة

تتجّه نحوه

تسنده لتدخله غرفة النوم

يدفعها بقوة

ليصطدم ظهرها بالحائط

اهوه : وخري عني وين بتودّيني شنو آنا ياهل ؟

اهيه : قوم الحين بنتك بتروح المدرسة لا تشوفك بهالحالة تطيح من عينها و الله

اهوه : يا أبلة لوّعتي جبدي كله تحسبين عمرج قاعدة بالمدرسة كل شيء عندج بنظام ترى آنا مو طالب عندج ... أوووف

بنرفزة

اهيه : صج يا قاعدين يكفيكم شر اليايين

يرفع يده مشيرًا بالسّبّابة

اهوه : شوفي آنا رايح أغسّل ويهي و إنتي قعدي نطريني لا تروحين مكان و سوّيلي قهوة

لمّا الحين ما خلّصت كلامي معاج

اهيه : آنا أقول نام أحسن لك إنتَ امش عدل عشان تتكلّم عدل

اهوه : ميخالف قولي اللي تقولين هم بنتكلّم

يغسل وجهه

يتوجّه لغرفة الجلوس بإنتظارها

تتجّه للمطبخ

تحضّر له القهوة

تتوجّه إلى غرفة الجلوس

تقدّمها له

و بعصبيّة

اهيه : هاك

اهوه : طقّيني بعد

اهيه : أوووف ... ترى وايد لوّعت جبدي و آنا وايد ملّيت منّك يعني وبعدين هذي مو حالة

بصوت عالي و بعصبيّة

اهوه : مليون مرة قلت لج تحجّي ويّاي عدل آنا مو ياهل عندج

تستفزّه

اهيه : إنتَ مو ياهل إنت أصغر من الياهل بسوالفك هذي سكران و حالتك حالة و سهران لي الصبح وبعد ياي تكمّلها اهني ... قوم فضحتنا لا تشوفك بنتك

بلا مبالاة

اهوه : ما راح أقوم خل تشوف ... ليش آنا شمسوي ؟

اهيه : ما تقولي بالله من أمس وين كنت ؟

اهوه : مو شغلج مو إنتي اللي تسإليني

اهيه : عيل منو ؟

اهوه : أي أحّد بس مو إنتي ... ترى وايد مسوّية روحج مرة علي ... بالمدرسة أبلة واهني ناظرة إنتي فيج نقص الناظرة مورّيتج بالمدرسة و تيين اهني تحطّين الحرّه فيني

تتجاهله

اهيه : ما تقولي شاللّي موصلك لهالحالة ؟

اهوه : إنتي

اهيه : زين و لي متى ؟

اهوه : لمّا تتعدّلين و تتسنّعين

بإستهزاء

اهيه : آنا ... إنتَ شوف عمرك و لا جنّك ريّال طول بعرض وين هيبتك وين احترامك لنفسك ... لا عارف تمشي ولا عارف تتكلم ترى والله عيب اللي تسوّيه

اهوه : آنا أشوف روحي إنتي اللي شوفي روحج كله سامته شعرج ويهج ما أدري شلون صاير وخلقتج تلوّع الجبد لا اسلوب لا منطق لا طريقة بالتفاهم لا و أبلة بعد ... بخاطري أحسّج مرة مثل الحريم تلبسين و تكشخين و تحطّين كله ما عندج وقت و هذا شكلج من الصبح لي الليل كل هذا و ما تبين أسكر و أطلع

اهيه : أكيد بتكون هذي حالتي و أكيد ما راح ألقى وقت أشوف عمري مو لو لاقية ريّال يروح الدوام مثل كل الريّاييل و يصرف على البيت جان ما شفتني جذي

يرفع يده ليضربها

تمسك يده

بنظرة متمرّدة

اهيه : لا تمد إيدك علي ... ما في ريّال يمد إيده على مرة

بإستهزاء

اهوه : هيهيهيهي منو اللي مرة ؟

اهيه : اللي سوّاك ريّال سوّاني مرة إذا آنا عندك مو مرة عند غيرك مرة و كل الحريم بعد

يثور و يغضب

يضرب صدره بقوة

اهوه : آنا ريّال غصبن عليج و إنتي اللي مو مرة

اهيه : آنا اللي أودّي و آنا اللي أييب و آنا اللي أسوي كل شيء آنا مآخذتك جذي ديكور تكمالت عدد آنا عندي وحدة و إنت الثاني صاير عالة علي والله تعبت

اهوه : مو عذر السنعة سنعة بس إنتي عمرج ما كنتي سنعة نسرة و لسانج طويل

اهيه : و عيوب الدنيا فيني ما تقولي بالله شالّلي مصبرك علي ؟

تنهض و تستعد للخروج

اهيه : بروح تأخّرت ضيّعت وقتي إنتَ واحد فاضي و آنا وراي دوام

ينهض ليمنعها من الخروج

يفقد توازنه و يقع على الكنبة

اهوه : تعالي قعدي خل نتفاهم ما خلصت كلامي

اهيه : روح اتسبّح لوّعت جبدي بريحتك قمت أحس كل شيء في البيت من ريحتك مكانك ... الفراش كل شيء حتى ريحتي أحسها مثل ريحتك والله لايعة جبدي من هالرّيحة على كثر ما أبخّر البيت و أتعطّر ماكو فايدة أحس ريحتك لازقة مو راضية تروح

اهوه : ليش اشفيها ريحتي ؟ ... قلت لج تعالي خل نتكلّم ما خلّصت كلامي معاج

اهيه : تكفه شاليديد يعني ؟ كل يوم نفس السالفة و نفس الشيء خل أروح أحسن و لمّا أرد نتكلّم و إلا أقولك رد اطلع أحسن و تعال باجر... و إلا أقولك لا تيي أحسن

تدخل ابنته

تجري نحوه لتلقي نفسها بأحضانه

بابا بابا

تُمسك يدها لتمنعها من الإقتراب منه

اهيه : ماما وخري عن بابا مريض لا يعاديج

يلا ماما حبيبتي نروح

تهز رأسها : إي

اهيه : حبيبتي ... حطّيتي الأكل اللي زهبته لج بالـ

lunch box

إي

اهيه : في شيء ناقص ؟

العصير

اهيه : الحين حبيبتي و احنا طالعين نمر الجمعية نييب عصير

تلوّح له بيدها : مع السلامة بابا

اهوه : لحظة لحظة خل أعطيها المصروف

تقف

تنظر له ببراءة

يُخرج محفظته

يبحث عن النقود

يجدها خالية

يشعر بالإحراج

ما عليه بابا ما سحبت

اهيه : ماما نطريني برّه آنا الحين يايه

هي مستاءة

اهيه : ترى عطيتها ... أدري إن ما عندك بس وقفت قلت بشوف جم عندك وجم بتعطيها

بنبرة استهزاء

اهيه : إنتَ خل يصير عندك بالبنك عشان يصير عندك بالبوك

تتناول حقيبتها من على الطاولة

تتأكّد من وجود نظارتها والموبايل

تتعطّر

تحمل حقيبة ابنتها

و تخرج

يخفض رأسه بإحباط

يضع كوب القهوة على الطاولة

يتمدّد على الكنبة

يغمض عينيه

و يغفو

هل ؟ ...

هل كل هؤلاء النائمون سعداء إذا ناموا ؟

أنا أؤمن أن بعض الهموم يولد أرقها معها و بعضها يولد يأسها معها ...

ربما هذا الهم اليائس يجعلهم ينامون ؟

محمد حسن علوان

تعال نقسم العالم بيني و بينك ... ؟

تعال نقسم العالم بيني وبينك ... ؟

القمر لك ... و النجوم لي ... ؟

البحر لك ... و الموج لي ... ؟

ولاّ أقولك ...

خل العالم كله لك ... ؟

بس ... إنت ... لي ... ؟

أحلى و أخف 3 قصص ... بصراحة حدهم funny

صباحكم ورد

الجو اليوم حده اينن روعة تدرون قرب الشتا و هالجو حده يخلي الواحد فينا يستانس و يتفاءل

لهالأجواء تأثير عجيب على نفسيتنا تزيد من نشاطنا و حيويتنا :)

و يا عل أيامكم كلها حلوة بحلاة هالجو و أكثر

و علشان جذي قررت أحط لكم بوست funny

و على الله ايوز لكم و يعجبكم :)

----------------------------------------

القصة الأولى

قصة خاتم سليمان

وحده انطرت ريلها يطلع للدوام و بس طلع قامت واتصلت على صديقها اييي عندها
يالها صديقها وياب معاه العشا و قعدوا قبل العشا يسولفون و يضحكون
شوية و إلا واحد يدق الجرس
توقعت المرة إنه ريلها قامت وخلت صديقها ينخش في الكبت و فتحت الباب
طلع صديقها الثاني ياي ويايب معاه حلويات
خلته يدخل و أول ما قعدوا و إلا الجرس يدق مره ثانيه
ونفس الحاله ,, دخلت صديقها الثاني في الكبت وراحت تفتح الباب
طلع صديقها الثالث ياي
دخلته و قعدوا شوي و إلا تسمع الباب ينفتح

طلع ريلها
راحت بسرعه ودخلت صديقها الأخير مع الباجين في الكبت

دخل ريلها وقالها اليوم مافي دوام
أوووووف
الحرمه توهقت شتسوي بالعالم اللي في الكبت
فقاالت لريلها ,, أقول حبيبي شفت الخاتم هذا
هذا خاتم سليمان أي شي تتمناه بس امسح على الخاتم واطلبه و يصير
مسحت على الخاتم وقالت يا مارد ييب لنا العشا
طلع صديقها الاول من الكبت وبيده الجيس اللي فيه العشا وقال تفضلوا
وطلع
بعد العشا مسحت على الخاتم مره ثانيه وقالت ييب لنا الحلى
طلع صديقها الثاني و ياب لهم الحلى
باقي الثالث توهقت فيه ما ياب شي وما تقدر تصرفه
وشوي
طلع صديقها الثالث وقالهم
السلام عليكم
سليمان يسلم عليكم
و يقولكم
إذا خلصتوا من الصحون رجعوها
لووووووووووول

--------------------

القصة الثانية

مكر النساء
إن كيدهن عظيم

كانت فتاة تسير في الغابة لوحدها عندما رات ضفدعا مسكينا عالقا في مصيدة فطلب منها الضفدع أن تنقذه قال لها الضفدع: إن أنقذتني فسوف أضمن لك تحقيق ثلاث أمنيات ففكرت الفتاة قليلا وقررت في النهايـة أن تساعد هذا الضفدع ولما تحرر الضفدع قال لها: لقد نسيت أن أخبرك أن هذه الامنيات الثلاث لها شروط فقالت الفتاة : ماذا تعني فقال لها الضفدع: ان حققت لك امنيـة فهذا يعني ان احقق 10 اضعافها لزوجك فقالت الفتاة بعد تفكير: موافقة فهو في النهايـة زوجي كانت اول امنياتها ان تصبح اجمل فتاة في العالم فحذرها الضفدع قائلا: موافق ولكن تذكري ان هذا يعني ان يكون زوجك اجمل رجل في العالم بل 10 اضعاف جمالك وقد تحاول النساء أن تأخذه منك فقالت له الزوجة: وما المشكلة انني ساصبح اجمل فتاة في العالم ولن يجد زوجي غيري ليحب ويتزوج اما الامنيـة الثانيـة فكانت ان تصبح اغنى فتاة في العالم فحذرها الضفدع قائلا: موافق ولكن ذلك يعني ان يكون لدى زوجك 10 اضعاف ثروتك فاجابت الفتاة : وما المشكلة فالمال الموجود معي هو ماله والعكس صحيح سوف نجمع ثروتي وثروته معا ولما سألها الضفدع عن امنيتها الثالثة... فقالت الفتاة : اريد ان تصيبني جلطة "بسيطة جداً" في القلب فسالها متعجبا: ولماذا فقالت الفتاة: لكي يصاب زوجي بعشرة اضعاف جلطتي واكثر ويموت بعدها واكون انا الوريثة الوحيده بعد موته ..
إن كيدهن عظييييييييييييم

--------------------

القصة الثالثة و الأخيرة

ما يغار عليها كلش

هاذي وحده زوجها ما يغار عليها كلش
طلعت معاه السوق ويوم ردوا قالت له : شفت الشباب اللي كانوا يمنا قبل شوي
تراهم حطوا رقمهم بجنطتي و احنا بالزحمه
قال : بروحج قلتيها .. ( بالزحمه ) ..!!
إرتفع ضغطها من زوجها البارد وفكرت بخطة ثانيه تخلي زوجها يغار عليها
راحت ليارهم ( أبو علي ) وقالت له على موضوع زوجها وكانت تبي منه حل لمشكلتها
قال أبو علي : لازم يشوف ريال عندك بالبيت عشان تتحرك مشاعره ويغار عليك
قالت : خلاص أنت يابو علي تعال لي
قال : لالا . أنا أعطيك الحل و بس
المهم . قعدت تترجاه وتقنعه إنه يجيها ويكون سبب في حل المشكله
وافق ( أبو علي ) وراح لها قبل لايطلع زوجها من الدوام
قامت الزوجه وحطت أبو علي بكبت الملابس .. وبعدها بدقايق وصل الزوج للبيت
قالت الزوجه للزوج : أبيك تشتري لي فستان
قال الزوج : فساتينك وايد .. يعني إنتي مو محتاجه تشترين
قالت : لا ما عندي و لا فستان ..
قال :كبتك مليان فساتين ..
قالت : لا . مافيه فساتين .. وإذا منت مصدّق روح وتأكد بنفسك .
راح الزوج وفتح الدولاب .. وقعد يعـدّ الفساتين
هذا فستان .. وهذا فستان .. وهذا فستان ..
أبو علي بالله وخرّ شوي .. وهذا فستان .. وهذا فستان ...!!
لووووووووووول

----------------------------------------

إن شاء الله عجبتكم القصص

و اللي عنده قصص حلوة مثل هالنوع أو أي نوع حاب يشارك و يضيفها حياه الله تسعدني مشاركتكم

و تواصلكم

بإنتظار تعليقاتكم

سلامي لكم :)

مبارك عليكم الشهر ... و كل عام و أنتم بخير :)

مبارك عليكم الشهر جميعا و كل عام و أنتو بصحة و خير و عافية

عسى الله يكتب لنا فيه الغفران و يعتقنا من النيران و يجعلنا أقرب للجنان

آمين . أجمعين

مني لكم :)

بريحة العطر والمسك والعود

رمضان علينا وعليكم يعود

شهر الخير والكرم والجود

تهاني لكم من قلب ودود

مكان القمر خليتك
ملاك الخير سميتك
عزيز وغالي ناديتك
وبشهر الخير هنيتك

مبارك عليكم الشهر

و سلامي لكم :)

إجازة تدوينية !

مسائكم ورد حبايب قلبي

في البداية أحب أشكر كل من سأل و تعنَّى عشاني مشكورين و ما قصرتوا فيكم الخير و هذا إن دل فيدل
على طيب أصلكم و وذوقكم

ثاني شيء بعد تفكير طويل و متواصل و عميق قررت آخذ إجازة تدوينية طويلة حيل
أو تقدرون تقولون ان صح التعبير تمديد لإجازتي التدوينية و اعذروني
طبعاً هالإجازة أول مرة آخذها و أول مرة أسويها :)

محتاج مساحة بحجم الكون أرضه و سماواته أول مرة أحس روحي تعبان عقلي مو معاي أفكر بعقل غيري
و أشوف بعين غيري
أحس فقدت قدرتي على شغلات وايد تقدرون تقولون الدنيا كسرتني أو همي كسرني
المهم في احساس بالكسر
و الجرح الكبير و العميق
الدنيا يا عالم مو هينة و اللي صار مو شوية !؟
ما أعتقد في أي أحد منكم يقدر يفهم أو يمكن يفهم بس استحالة يحس باللي صار
عالعموم تواصلكم الغالي و تواجدكم حولي أسعدني
و حالياً ما أقدر أكون موجود ما أقدر أكتب أو أعبر أو أسوي أي شيء حايشني شلل و جمود فكري
فاقد قدرتي على العطاء و التعبير و عشان جذي قررت أمدد إجازتي و عذروني على القصور

و إن شاء الله أرد بعد هالإجازة ببوستات و مواضيع يديدة


مني لكم :)

تمنى ما شئت لكن اتخذ سبباً
اكتب ما شئت لكن لا تستفز أحداً
اقرأ ما شئت لكن لا تنسى النقد أبداً
انتقد كما شئت لكن لا تطعن أحداً

شاهد ما شئت لكن كن مهذباً
اسمع ما شئت لكن لا تزعج أحداً
تغابى كما شئت لكن كن مؤدباً
قل ما شئت لكن إياك أن تغتاب أحداً

افعل ما شئت لكن لا تعذب أحداً
تميز بما شئت لكن لا تتكبر أبداً
خاصم من شئت لكن لا تشتم أبداً
اغضب كما شئت لكن لا تلعن أحداً

امزح كما شئت لكن لا تكذب أبداً
ابتسم كما شئت لكن لا تقهقه أبداً
كن حراً كما شئت لكن لا تستعبد أحداً
افرح كما شئت لكن لا تغضب أحداً

صاحب من شئت لكن لا تجامل أبداً
امدح من شئت لكن لا تبالغ أبداً
ارفض ما شئت لكن لا تكن معقداً
أحب من تحب لكن لايضعفك حبك

تاجر كما شئت لكن لا تكن غشاشاً أبداً
اصبر كما شئت لكن لا ترضخ أبداً
قاوم كما شئت لكن لا تستسلم أبداً
صم الدهر كله لكن لا تخبر أحداً

ادع إلى الخير كما شئت لكن لا تتردد
اذكر ربك كما شئت لكن لا تنقطع أبداً
امشِ كما شئت لكن لا تكن مختالا أبداً
نم كما شئت لكن لا تنسى القيام أبداً

صلي صلاتك حيث كنت لكن لا تتهاون أبداً
واظب على النفل حيث كنت لكن لا تغفل أبداً
املك ما شئت لكن لا تحتقر أحداً
احكم كما شئت لكن لا تظلم أحداً

كل ما شئت لكن لا تنسى أن تحمد
هاجر كما شئت لكن لا تفسد في الأرض أبداً
اصرخ.. ثِر.. لكن تذكر الصمت اسلم

بيني و بينكم
أفتخر إنكم ربعي و إنكم الحب الحقيقي
و يكفيني لا ذكرتكم أنسى حزني و ضيقي


همسة
كل لحظة تجمعنا اليوم قد لا تتكرر غداً
فلنبقي الحب و الأخوة رباط ود لا يقطعه
قول قاسي
أو ظن سيء
أو استهتار جارح
و لنبني بلوقاتنا على هذا الأساس
أترككم في رعاية الله و حفظه

سامحوني على القصور



و سلامي لكم :)

أنتِ و أنا

بما أني جزءاً منكِ و من عالمكِ

فالحياة بعيداً عنكِ ليست بالأمر السهل

فانا أجد نفسي أفتقدكِ

و على الرغم أننا لسنا مع بعض الآن

فإن أفكارك الرقيقة تملأ أيامي

و أحلامك الجميلةِ تملأ ليالييِ

لا يهمني ما أفعلهُ

لكن ما أعلمهُ

إنه لشعور جميل لو أمكنني مشاركتكِ فيه

فأنا أتخيل ما ستقولينه لو كنتِ معي الآن

و أتخيل الطريقة التي ستضحكين بها

إذا حدث شيئاً ما مضحك

و الشيء الآخر الذي أعلمه

أني أحلم بما يمكننا فعلهُ إذا كنا سوياً

و رغم المسافة التي تباعد بيننا

فأنا أشعر بقربكِ مني

و لا أملك إلا الأمل بأن تحملني الأيام إليكِ

أريدك بجانبي

لأتحدث معكِ

لألمسكِ

لأحبكِ

بيني و بينكم

عندما تشتاق القلوب تبحث عن أعز مخلوق

له في الفؤاد مكانة وخلود

فتذكره بالخير وبالدعاء للمعبود

اللهم احفظ صاحب القلب الودود

مني لكم

عسى الفرح والحب يكثر بدنيـاكم

وعسى السعادة ما تفارقك سنينكم

الله يقدرنـي وأجـازي طيبكم

يا الله عساني ما أنحرم من ملاقاكم

و لا أفقدكم وأقول ويني و وينـكم

الله يحفظكم و يحميكم وين ما كنتوا :)

سلامي لكم :)